मुंबईत दोन आठवड्यात संपणार करोना !

मुंबईत दोन आठवड्यात संपणार करोना !

- राज्यात दोन तर देशात अडीच महिन्यात

- आयआयटी मुंबईतील प्राध्यापकांचा अभ्यास

म.टा. प्रतिनिधी, मुंबई

मुंबईतील करोना महामारी येत्या दोन आठवड्यात संपुष्टात येईल. तसेच राज्यातील दोन व देशातील ही महामारी अडीच महिन्यांत संपेल, असा अभ्यास आयआयटी मुंबईतील प्राध्यापक भास्करन रामन यांनी मांडला आहे.

अमेरिकन प्रा. मायकल लेविट यांनी चीनच्या हुबेई प्रांतातील करोना महामारीचा अभ्यास केला. हुबेईतील स्थितीनुसार त्यांनी अन्य देशातील करोना संकटाचा अभ्यास मांडला. प्रा. लेविट यांनी मांडलेल्या अभ्यासाचा भारतावर कसा परिणाम होईल, हे रामन यांनी मांडले आहे.

अन्य देशांमधील लोकसंख्या व त्या लोकसंख्येच्या तुलनेत तेथील करोना रुग्णांचा आकडा तसेच मृतांची संख्या, यांचा विचार केल्यास भारतातील हा आकडा फार कमी आहे, असे रामन यांनी बिजगणितीय अभ्यासाद्वारे मांडले आहे. यामुळेच देशभरातील करोना महामारी आता अंतिम टप्प्याकडे असल्याचे त्यांचे म्हणणे आहे.

रामन यांच्यानुसार, गुजरातमधील करोना महामारी पूर्णपणे संपुष्टात आली आहे. दिल्लीत महामारी संपुष्टात येण्यास आणखी अडीच आठवड्यांचा कालावधी लागेल. चेन्नईतील ही महामारी पुढील दोन ते चार आठवड्यात संपुष्टात येईल. यामुळेच पुढील अडीच महिन्यात देशातील करोना महामारी संकटाचा अस्त होईल. पण त्याचवेळी कर्नाटकमध्ये आत्ता या महामारी संकटाची सुरुवात झाल्याचे चित्र आहे.

'करोना' ची तुलना अशी

देश लोकसंख्या करोनामृत्यू प्रतिदिन मृत्यू

युके ६.७० कोटी ४५ हजार ४५

स्वीडन १ कोटी ५५०० ६

ब्राझील २१ कोटी ७२ हजार ११

इटली ६ कोटी ३५ हजार १९

भारत १३८ कोटी २३ हजार ७०० १ (पुढील अडीच महिन्यांत)

मुंबई २ कोटी ५३०० १ (पुढील दोन आठवड्यांत)