शेकाप नेत्यांसमोर नाराजांचे संकट

म. टा. वृत्तसेवा, पनवेल

पनवेल महापालिकेच्या निवडणुकीत पराभव झाल्यानंतर शेतकरी कामगार पक्षाच्या नेत्यांसमोर स्वीकृत नगरसेवकपद कोणाला द्यायचे, यावरून कार्यकर्त्यांना सांभाळायचे संकट आले होते. निवडणूक होऊन चार महिने उलटल्यानंतर आता विरोधी पक्ष नेतेपदावरून पक्षातील नगरसेवकांमध्ये नाराजी आहे.

१९ सप्टेंबरला होणाऱ्या महासभेत विरोधी पक्षाची निवड होणार होती. विरोधी पक्षनेता ठरविण्यासाठी गटनेते प्रितम म्हात्रे यांनी सर्व नगरसेवकांना शेकापच्या पनवेल येथील मध्यवर्ती कार्यालयात त्याच दिवशी दुपारी बोलवले होते. पक्ष कार्यालयात आमदार बाळाराम पाटील उपस्थित होते. यावेळी झालेल्या चर्चेत विरोधी पक्षनेते पद देण्याची चर्चा झाली नाही. यावेळी महासभेला जाण्याच्या सूचना देण्यात आल्या. मात्र महासभेत सुरुवातीलाच झालेल्या गोंधळामुळे नगरसेवक अरविंद म्हात्रे यांच्या निर्णयावरून विरोधी पक्षाच्या नगरसेवकांनी सभात्याग केला. गटनेते प्रितम म्हात्रे हे याच सभेत स्वतःचे नाव विरोधी पक्षनेते पदासाठी देणार असल्याचे सर्व नगरसेवकांना नंतर समजल्याने काही नगरसेवकांनी उघड नाराजी व्यक्त केली. जिल्हा परिषदेचे उपाध्यक्ष, जिल्हा नियोजन समिती सदस्य पदावर काम केलेले नगरसेवक अरविंद म्हात्रे पक्षाच्या या निर्णयाबद्दल नाराज झाले आहेत. एकेकाळी पनवेल पंचायत समितीचे सभापती राहिलेले नगरसेवक हरेश केणी यांनीदेखील नाराजी व्यक्त केली.

पक्षश्रेष्ठी घेतील त्या निर्णयासोबत आम्ही आहोत. मात्र नेत्यांनी निर्णय घेताना आम्हाला विचारायला पाहिजे होते. इतकीच आमची इच्छा असल्याचे म्हात्रे यांनी ‘मटा’शी बोलताना सांगितले. महाआघाडीच्या वाट्याला आलेल्या स्वीकृत नगरसेवक म्हणून निवड करतानाही पक्षनेतृत्वावर हीच वेळ आली होती. माजी नगरसेवक गणेश कडू यांना महापालिका जिल्हाचिटणीसपद देऊन त्यांची नाराजी दूर केली. मात्र २० वर्षे नगरसेवक, अनेक वर्षे विरोधी पक्षनेते राहिलेले माजी नगराध्यक्ष संदीप पाटील आजही नाराज आहेत. पक्ष संघटनेत सक्रिय असलेले सचिन ताडफळे हेदेखील नाराज आहेत.