स्वतंत्र डीसीआरला विरोध कायम

म. टा. वृत्तसेवा, नवी मुंबई

मुंबई महानगर प्रदेश विकास प्राधिकरणाच्या एकात्मिक विकास नियंत्रण नियमावलीत नवी मुंबई महापालिकेचा समावेश करण्यास नकार देत शहरासाठी स्वतंत्र नियमावली तयार करण्याचा निर्णय राज्य सरकारने घेतला आहे. मात्र सरकारच्या या प्रस्तावाला बुधवारी झालेल्या सर्वसाधारण सभेत नगरसेवकांनी तीव्र विरोध केला.

राज्य सरकारच्या आदेशानुसार नवी मुंबई महापालिकेने आपली स्वतंत्र विकास नियमावली तयार करण्याचे काम सुरू केले असल्याचे महापालिकेचे अतिरिक्त आयुक्त अंकुश चव्हाण यांनी सभागृहात सांगितले. मात्र या निर्णयाला नगरसेवकांनी विरोध केला. नवी मुंबई शहराची भौगोलिक परिस्थिती पाहता येथील नागरिकांचे प्रश्न सोडविण्यासाठी व शहराच्या विकासासाठी स्वतंत्र विकास नियंत्रण नियमावली नको तर एमएमआरडीएच्याच एकात्मिक विकास नियंत्रण नियमावलीत नवी मुंबई शहरांचा समावेश करण्याच्या मागणीवर येथील नगरसेवक ठाम आहेत. त्यासाठी त्यांनी स्वतंत्रपणे राज्य सरकारच्या नगररचना विभागाच्या उपसंचालकांकडे हरकती व सूचना लेखी स्वरुपात दिल्या आहेत.

महापालिका प्रशासनानेदेखील नवी मुंबईचा एमएमआरडीए विकास नियंत्रण नियमावलीत सहभाग करून घेण्याची विनंती नगरविकास विभागाकडे करावी, अशी मागणीदेखील नगरसेवकांनी लावून धरली आहे. परंतु सरकारचे आदेश किंवा सूचना येणार नाही, तोपर्यंत नवी मुंबई महापालिका प्रशासन तशी मागणी करणार नसल्याची भूमिका अतिरिक्त आयुक्त अंकुश चव्हाण यांनी सभागृहात मांडली.

महापालिका सभागृहात विकास नियंत्रण नियमावलीसंदर्भात सदस्यांच्या हरकती व सूचना आणि मंजुरीसाठी ठेवल्या जाणार आहेत. त्या मांडून नियमावलीत बदल करून घेणे फायद्याचे ठरेल. सभागृहाच्या मंजुरीनंतर ती सरकारकडे मंजुरीसाठी पाठविण्यात येईल. त्यामुळे सदस्यांना नियमावलीत बदल करण्याची संधी असल्याचेही अंकुश चव्हाण म्हणाले.