मारहाण करणाऱ्या दाम्पत्याला जामीन

नवी मुंबई : नो एण्ट्रीमधून जाणाऱ्या गाडीला अडविणाऱ्या वाहतूकपोलिसाला भर रस्त्यात मारहाण करणाऱ्या महिलेवर तसेच तिच्या पतीवर तुर्भे एमआयडीसी पोलिसांनी सरकारी कामकाजात अडथळा निर्माण केल्याप्रकरणी गुन्हा दाखल करून दोघांना शुक्रवारी सकाळी अटक केली. दुपारी या दोघांची सीबीडी न्यायालयाने जामिनावर मुक्तता केली.

सपना धनाजी पाटील (२९) आण‌ि पती सोपान विष्णु आव्हाड (२९) यांनी जबरदस्तीने आपली गाडी प्रवेश बंद असलेल्या मार्गावरून नेण्याचा प्रयत्न केला होता. तेव्हा वाहतूक पोलिस प्रीतेश भातुसे यांनी कारची चावी काढून कार अडवली. कारचालक व भातुसे यांच्यात वाद सुरू असतानाच सपना यांनी भातुसे यांना मारहाण केली.

ही महिला तुर्भे गावातील असून ती मसाज पार्लर चालवत असल्याचे तपासात आढळले आहे. तिच्या कारवर पोलिस असल्याचे स्टिकर लावल्याचे आढळून आले आहे. त्यामुळे पोलिसांनी त्या दोघांची चौकशी सुरू केली आहे.