म. टा. वृत्तसेवा, पनवेल
देशात लॉकडाऊन असतानाही नागरिक अत्यावश्यक सेवेच्या नावाने घराबाहेर पडत आहेत. पनवेल शहर पोलिसांनी विनाकारण घराबाहेर पडणाऱ्या नागरिकांवर लक्ष ठेवत बुधवारी मॉर्निंग वॉकसाठी बाहेर पडलेल्या १२ नागरिकांवर गुन्हे दाखल केले. पोलिसांनी त्यांना पोलिस ठाण्यासमोर व्यायाम करण्याची शिक्षा दिली. अनेकांनी पोलिसांना विनवण्या करून यापुढे बाहेर पडणार नाहीत, आता आम्हाला सोडा अशी विनंती केली मात्र वरिष्ठ पोलिस निरीक्षक यांनी सगळ्यांवर १८८ कलमाप्रमाणे गुन्हे दाखल करण्यात आले आहेत.
पोलिस उपायुक्त अशोक दुधे पोलिस कारवाईची पहाणी करण्यासाठी बुधवारी सायंकाळी ५ वाजता कळंबोलीतील करावली चौकात उभे असताना एक १७ वर्षांचा मुलगा दुचाकीवर बाहेर आला होता. घराबाहेर का पडला, याचे कारण विचारले असता पाव खरेदीसाठी मी घराबाहेर आलो असल्याचे त्यांनी सांगितले. हे कारण ऐकून पोलिस उपायुक्त अशोक दुधे यांनी आश्चर्य व्यक्त केले. वाहन चालविण्याचा परवाना नसताना मुलगा घराबाहेर पालक कसे पाठवू शकतात, असा प्रश्न त्यांनी उपस्थित केला. अत्यावश्यक सेवांसाठी सायंकाळी कारण नसताना लोक घराबाहेर पडत आहेत, नागरिकांनी घराबाहेर पडणे म्हणजे स्वत:सोबत इतरांचा जीव धोक्यात टाकणे आहे. शुल्लक कारणासाठी सुट दिल्याचा गैरफायदा घेऊन घराबाहेर पडू नका, पोलिसांना आणि समाजाला सहकार्य करा, अन्यथा कठोर कारवाई केली जाईल. पोलिसांना कठोर वागण्यास नागरिकांनी भाग पाडू नका, असे आवाहन दुधे यांनी केले.