ग्राहक-वेटरमध्ये हाणामारी

पनवेल : मद्यपान झाल्यानंतर बिल भरणार नाही, असे सांगून वेटरच्या अंगावर सामान फेकणारा ग्राहक आणि वेटरमध्ये नवीन पनवेलच्या फिनिक्स हॉटेलमध्ये वाद आण‌ि नंतर हाणामारी झाल्याप्रकरणी खांदेश्वर पोलिस ठाण्यात दोघांविरोधात अदखलपात्र गुन्हा नोंदविण्यात आला. खांदेश्वर पोलिस ठाण्याकडून दोघांनाही १४९ कलमाप्रमाणे नोटीस देण्यात आली.

नवीन पनवेल सेक्टर ८ येथील फिनिक्स रेस्टॉरण्टमध्ये रणजित जोशी नामक ग्राहक मद्यपान केल्यानंतर झालेले बिल देण्यास तयार नव्हता. यावरून हॉटेल व्यवस्थापक आणि जोशी याच्यात वाद झाला. वादाचे रूपांतर हाणामारीत झाले. जोशी यांनी मित्राला बोलावून पैसे भरले. काही वेळाने ग्राहक जोशी यांनी चार-पाच जणांच्या टोळक्याला बोलावून ते हॉटेल व्यवस्थापक आणि वेटरना दमबाजी करू लागले. त्यामुळे पुन्हा हाणामारी झाली.