तब्बल २९३ कासवांची सुटका.
म. टा. वृत्तसेवा, नवी मुंबई
शिवनेरी बसमधून तब्बल २९३ कासवांची तस्करी करणाऱ्या दुक्कलीला महसूल गुप्तवार्ता विभागाच्या पथकाने सापळा लावून अटक केली आहे. श्रीकांत लिंगाराजू (२०) व कोंडिया लिंगाराजू (२७) अशी या दोघांची नावे असून त्यांनी कर्नाटक येथून आणलेली स्टार जातीची तब्बल २९३ कासवे विभागाने जप्त केली आहेत.
वाशीमध्ये काही व्यक्ती मोठ्या संख्येने कासव घेऊन येणार असल्याची माहिती महसूल गुप्त वार्ता विभागाच्या अधिकाऱ्यांना मिळाली होती. त्यानुसार महसूल गुप्त वार्ता, वन्यजीव अपराध नियंत्रण कक्ष व वन्य परीक्षेत्र विभागाच्या पथकाने गेल्या शनिवारी दुपारी वाशी येथे सायन-पनवेल महामार्गालगत सापळा रचला होता. यावेळी पुण्याहून मुंबईच्या दिशेने जाणाऱ्या शिवनेरी बसमधून भल्या मोठ्या बॅगा घेऊन उतरलेल्या दोघा संशयितांना पथकाने ताब्यात घेऊन त्यांच्याजवळ असलेल्या बॅगांची तपासणी केली. या बॅगांमध्ये स्टार जातीची लहान-मोठी २९३ कासवे आढळून आली. त्यामुळे या पथकाने श्रीकांत लिंगाराजू व कोंडिया लिंगाराजू या दोघांवर वाशी पोलिस ठाण्यात गुन्हा दाखल करून त्यांना अटक केली. या प्रकरणात अटक करण्यात आलेले दोघेही मूळचे कर्नाटक राज्यातील असून त्यांनी वाशीतील पाळीव प्राणी विक्री केंद्र चालकाला कासवविक्री करण्यासाठी आणल्याचे त्यांच्या चौकशीतून निष्पन्न झाले आहे. त्यानुसार पोलिसांनी पाळीव प्राणी विक्री केंद्राचा चालक तानाजी कलंगे याचा शोध सुरू केला आहे. अटक करण्यात आलेल्या दोघांवर ९०० कासवांची तस्करी केल्याप्रकरणी कोलकाता पोलिसांनी यापूर्वी कारवाई केली आहे.