नवी मुंबई : महापालिकेने तलाव व्हिजन अंतर्गत शहरातील तलावांची दुरुस्ती व सुशोभीकरणास सुरुवात केली आहे. त्यानुसार दारावे सेक्टर २३मधील तलावाची सुधारणा करण्याचा निर्णय महापालिकेने घेतला आहे. या तलावामधील गाळ काढण्यासह दुरुस्तीचे काम करण्यात येणार असून त्यासाठी ७५ लाख ८२ हजार रुपये खर्च केले जाणार आहेत. दारावे गावामधील नागेश्वर तलावाचीही दुरवस्था झाली आहे. याठिकाणी परिसरातील नागरिक सकाळी व सायंकाळी पेरफटका मारण्यासाठी येत असतात. गणेश विसर्जनही तलावामध्ये केले जाते. तलावामधील गाळ काढून दुरुस्ती करण्याची मागणी नागरिकांनी केली होती, तसेच स्थानिक नगरसेवक सुनील पाटील यांनी प्रशासनाकडे पाठपुरावा केला होता. अखेर या तलावाचा गाळ काढण्यासह विसर्जनासाठी घाट तसेच दुरुस्तीची कामे केली जाणार आहेत. तलावाच्या दुरुस्तीसाठीच्या प्रस्तावास स्थायी समितीने मंजुरी दिली आहे. या कामावर ७५ लाख ८२ हजार रुपये खर्च होणार असून, यासाठी नऊ महिन्यांचा कालावधी लागणार आहे.
दारावे तलावाचा गाळ काढणार
महापालिकेने तलाव व्हिजन अंतर्गत शहरातील तलावांची दुरुस्ती व सुशोभीकरणास सुरुवात केली आहे...
महाराष्ट्र टाइम्स.कॉम 9 Jun 2019, 4:00 am