म. टा. वृत्तसेवा, नवी मुंबई
अखिल भारतीय गांधर्व महाविद्यालयातर्फे ग्वाल्हेर घराण्याच्या ख्यातनाम गायिका दिवंगत डॉ. वीणा सहस्त्रबुद्धे यांना संगीत महामहोपाध्याय ही पदवी देऊन सन्मानित करण्यात येणार आहे. हा कार्यक्रम ६ मे रोजी वाशीतील सेक्टर ९ 'अ'मधील गांधर्व निकेतन येथे सायंकाळी साडेपाच वाजता आयोजित करण्यात आला असून हा पुरस्कार तालयोगी पद्मश्री पं. सुरेश तळवळकर यांच्या हस्ते प्रदान करण्यात येणार आहे.
पंडिता वीणा सहस्त्रबुद्धे यांच्या संगीत क्षेत्रातील भरीव कामगिरीबद्दल त्यांना मरणोत्तर हा पुरस्कार जाहीर करण्यात आला आहे. त्यांच्यातर्फे डॉ. हरी सहस्त्रबुद्धे हा पुरस्कार स्वीकारणार आहेत. डॉ. वीणा सहस्त्रबुद्धे यांचे वडील पं. शंकरराव बोडस हे पं. विष्णु दिगंबर पलुस्कर यांचे शिष्य होते. संगीताचे शिक्षण, प्रचार प्रसार करण्यासाठी पं. पलुस्करांनी त्यांना कानपूर येथे पाठविले. त्यांच्या मार्गदर्शनाखाली वीणा सहस्त्रबुद्धे यांनी संगीताचे धडे घेतले. पुढील आयुष्यात त्यांनी संगीताच्या क्षेत्रात अनेक नवनवीन प्रयोग केले. अनेक तराने बांधले, वेगवेगळ्या बंदिशी रचल्या, देश-विदेशात संगीताचे कार्यक्रम केले. त्यांचे थोरले बंधू पं. काशिनाथ बोडस यांनी स्वरबद्ध केलेल्या संतांच्या रचना त्यांनी गाऊन लोकप्रिय केल्या. संगीत नाटक अकादमीतर्फे त्यांना पुरस्कार देऊन गौरविण्यात आले आहे.