म. टा. वृत्तसेवा, नवी मुंबई नवी मुंबई महापालिकेच्या वतीने वाशीतील डेपोच्या विकासाचे काम हाती घेण्यात आले आहे. या ठिकाणी २१ मजली टॉवर उभारण्याचे नियोजित होते, मात्र या टॉवरची उंची पर्यावरणाच्या नियमांआड येत असल्याने सध्या हे काम बंद पडले आहे. हे काम पर्यावरणाच्या नियमांचे उल्लंघन करून केले जात असल्यामुळे या कामाची तक्रार सामाजिक कार्यकर्त्यांनी पर्यावरण आणि नगर विकास मंत्रालयाकडे केली असून या संदर्भात दोषींवर कारवाई करण्याची मागणीही त्यांनी केली आहे. वाशी डेपोच्या विकासाचे काम सुरू करण्यासाठी जुलैमध्ये कंत्राटदाराला 'वर्क ऑर्डर' देण्यात आली होती, मात्र आत्ता हे काम बंद पडले आहे. सन २०१५मध्ये पर्यावरण खात्याने ठाणे खाडीच्या दहा किमीपासूनचा परिसर 'बफर झोन' म्हणून घोषित केला आहे. त्यामुळे त्याच्या आत येणाऱ्या बांधकामाच्या उंचीवर निर्बंध आले आहेत. वाशी डेपोचा परिसर त्यातच येत असल्याने पर्यावरण विभागाकडून या कामाच्या परवानगीसाठी हिरवा कंदील मिळणे कठीण झाले आहे. काम सुरू झाल्यापासून सहा महिन्यांपर्यंत ही परवानगी मिळेल, अशी अपेक्षा होती, मात्र तसे होऊ शकले नाही. पर्यावरण मंत्रालयातून फ्लेमिंगो क्षेत्र कमी करण्यासाठी प्रयत्न सुरू झाले आहेत. ते कधी यशस्वी होईल, याकडे सर्वांचे लक्ष लागले आहे. मात्र तोपर्यंत हा १६० कोटींच्या प्रकल्पाचे काम बंद आहे. काम बंद झाल्याने प्रकल्पाची खर्चरक्कमही वाढणार आहे. हा सर्वसामान्यांच्या पैशांचा अपव्यय आहे, शिवाय पर्यावरणाच्या नियमांचे उल्लंघनही आहे. या कामासाठी सल्लागार नेमले आहेत, ज्यांना चांगला मोबदलाही दिला आहे. त्यामुळे पर्यावरण मंत्रालयाची परवानगी घेण्यासाठी सल्लागारांनी त्यांची भूमिका योग्य प्रकारे निभावणे आवश्यक होते, मात्र न झाल्याचा आरोप सामाजिक कार्यकर्ते अनर्जीत चौहान यांनी केला आहे. त्यामुळे दोषींवर कारवाई करावी, अशी मागणी केली आहे.
वाशी डेपोच्या कामाच्या चौकशीची मागणी
म टा वृत्तसेवा, नवी मुंबईनवी मुंबई महापालिकेच्या वतीने वाशीतील डेपोच्या विकासाचे काम हाती घेण्यात आले आहे...
महाराष्ट्र टाइम्स.कॉम 17 Dec 2019, 4:00 am