सातवा वेतन आयोग लागू करण्याची मागणी

नवी मुंबई: नवी मुंबई महापालिका आस्थापनेवरील सर्व कायमस्वरुपी, कंत्राटी आणि ठोक मानधनावरील अधिकारी-कर्मचारी यांना सातव्या वेतन आयोगानुसार वेतन आणि भत्ते लागू होण्याच्या अनुषंगाने महापालिका सर्वसाधारण सभेची मान्यता मिळावी, अशी मागणी नवी मुंबई म्युनिसिपल मजदूर युनियनतर्फे महापौर तसेच महापालिका आयुक्त यांच्याकडे पत्राद्वारे करण्यात आली आहे.

राज्य सरकारने राज्यातील सरकारी-निमसरकारी आणि स्वायत्त संस्थेतील अधिकारी तसेच कर्मचारी वर्गास सातव्या वेतन आयोगाच्या शिफारशी लागू करण्याबाबत गेल्या ३० जानेवारी २०१९ रोजी अधिसूचना जारी केली. नवी मुंबई महापालिकेचा प्रशासकीय कारभार राज्य सरकारच्या नियमानुसार सुरू आहे. नवी मुंबई महापालिकेने अद्याप अधिकारी आणि कर्मचारी यांच्यासाठी स्वतंत्र वेतन श्रेणी लागू केली नसून महापालिका सर्वसाधारण सभा मंजूर ठराव १९९६नुसार महाराष्ट्र नागरी सेवा (वेतन) नियम १९८१अन्वये वेतन-भत्ते अदा केले जात आहेत. त्यानुसार नवी मुंबई महापालिका आतापर्यंत पाचव्या आणि सहाव्या वेतन आयोगाच्या शिफारशीप्रमाणे आस्थापनेवरील अधिकारी आणि कर्मचारी यांना वेतन आणि भत्ते अदा करीत आहेत.

सातव्या वेतन आयोगानुसार महापालिकेतील सर्व कायम, कंत्राटी तेसच ठोक मानधनावरील अधिकारी-कर्मचारी यांना वेतन आयोगाच्या शिफारशी लागू करण्यात याव्यात, अशी मागणी नवी मुंबई म्युनिसिपल मजदूर युनियनच्या वतीने कार्याध्यक्ष रमाकांत पाटील यांनी केली आहे.