महापालिकेने बालमाता शुश्रूषा केंद्र उभारावे

म. टा. वृत्तसेवा, पनवेल

१ ऑक्टोबर रोजी महापालिकेने सिडकोकडील आरोग्यसेवांचे हस्तांतरण करून घ्यावे, असा अल्टिमेटम सिडकोने महापालिकेला दिला आहे. तत्पूर्वी सिडकोकडून महापालिकेने ५० खाटांचे बालमाता शुश्रूषा केंद्र उभारून घ्यावे, अशी मागणी सिडकोचे पनवेल शहर राष्ट्रवादी काँग्रेसचे अध्यक्ष माजी नगरसेवक शिवदास कांबळे यांनी महापालिकेकडे केली आहे.

महापालिकेकडे मनुष्यबळ नसल्यामुळे सेवासुविधा पुरविणे मोठे जिकीरीचे होणार आहे. मात्र सिडकोकडून निदान ५० खाटांचे बाल माता शुश्रूषा केंद्र उभारल्यास सर्वसामान्य कुटुंबातील महिलांची चांगली सोय होईल. आरोग्य सेवेच्या हस्तांतरणापूर्वी सिडकोकडून महापालिकेने ही सेवा करून घ्यावी, या मागणीचे पत्र माजी नगरसेवक शिवदास कांबळे यांनी महापालिकेकडे दिले. महापौर डॉ. कविता चौतमोल आणि आयुक्त डॉ. सुधाकर शिंदे यांना हे पत्र दिले आहे.

निसर्गरम्य स्थळेही हस्तांतरित करा

शिवदास कांबळे यांनी आणखी एक मागणी केली आहे. आरोग्याच्या दृष्टीने महत्त्वाची असणारी निसर्गरम्य स्थळेदेखील सिडकोकडून हस्तांतरित करून घ्यावीत, जेणेकरून महापालिकेतील नागरिकांना आरोग्याच्या दृष्टीने याची मदत होईल आणि स्थळे विकसित करून महापालिकेला उत्पन्नदेखील मिळेल, अशा मागणीचे दुसरे पत्र कांबळे यांनी महापालिकेला दिले आहे.