शिवाजी चौकात वाहतूक बेटाची मागणी

म. टा. वृत्तसेवा, पनवेल

खांदा वसाहतीत शिवाजी चौकात मोठ्या प्रमाणात वाहतूककोंडी होत आहे. दररोज शिवाजी चौकात लहान-मोठे अपघात घडतात. याकरता येथे सर्कल बसवण्याची मागणी स्थानिक नगरसेविका सीता पाटील यांनी महापालिका आणि सिडकोकडे पत्राद्वारे केली आहे.

शिवाजी चौकातून आसूडगाव, पनवेल, नवीन पनवेल आणि राष्ट्रीय महामार्गाकडे जाणारे रस्ते फुटतात. त्यामुळे येथे दिवसभर रहदारी असते. चारही बाजूंनी दुकाने असल्याने वाहने रस्त्याच्या कडेला उभी केली जातात. त्यामुळे वाहतुकीला अडथळा निर्माण होत आहे. त्यातच खांदेश्वर रेल्वे स्थानकाकडून येणाऱ्या शेअर रिक्षा नेमक्या गर्दीच्या वेळी चौकात थांबतात. चौकातून वाहतूक नियमन व्यवस्थित होत नसल्याने आता सकाळी आणि सायंकाळी कोंडी होत आहे. वाहनांचा रांगा लागत असल्याने गैरसोयीला सामोरे जावे लागते.

दररोज लहान मोठे अपघातही घडतात. म्हणूनच येथे लहान सर्कल म्हणजेच वाहतूक बेट उभारावे जेणेकरून वाहनांना शिस्त लागेल, असे मत सीता पाटील यांनी व्यक्त केले आहे. त्यांनी याबाबत सिडकोचे नवीन पनवेलचे कार्यकारी अभियंता आणि महापालिका आयुक्त डॉ. सुधाकर शिंदे यांना पत्र दिले आले आहे.