म. टा. खास प्रतिनिधी, नाशिक
महापालिका क्षेत्रात दिवसागणिक डेंग्यू आणि स्वाइन फ्लूचा धोका वाढत असून, साथीच्या आजाराने शहरच फणफणले आहे. शहरात एका घराआड तापाचा रुग्ण आढळून येत असून, महापालिकेच्या आरोग्य विभागाने ८७ हजार घरांची तपासणी केली आहे. तब्बल १९४१ घरांमध्ये डेंग्यूच्या अळ्या आढळल्या आहेत. गारठ्यामुळे स्वाइन फ्लूच्या संशयित रुग्णांची संख्याही वाढत आहे. त्यामुळे डेंग्यू, स्वाइन फ्लू आणि तापाच्या साथीमुळे खासगी रुग्णालये सध्या फुल्ल झाली आहेत. स्वाइन फ्लू आणि डेंग्यू संशयितांची आकडेवारी खासगी रुग्णालयातून बाहेर पडू दिली जात नसल्याचे चित्र आहे, तर दुसरीकडे महापालिकेची यंत्रणा मात्र सुस्त आहे.
साथीच्या आजारांनी सध्या संपूर्ण शहर तापले आहे. पावसाने विश्रांती घेतली असली तरी हवेतील गारठा वाढल्यामुळे सर्दी, खोकला, ताप, पडसे या आजारांच्या रुग्णांची संख्या वाढतच आहे. अशातच डेंग्यू, चिकनगुन्या व स्वाइन फ्लूचे रुग्णही वाढत असल्याने आरोग्य व वैद्यकीय विभागाची झोप उडाली आहे. शहरातील वाढत्या साथरोगाला प्रतिबंध करण्यास महापालिकेचा वैद्यकीय व आरोग्य विभाग अपयशी ठरल्यामुळे स्थायी समितीमध्ये जोरदार टीका झाली होती. त्यानंतर महापौर रंजना भानसी यांनीही विभागीय स्वच्छता निरीक्षकांसह प्रमुख अधिकाऱ्यांची बैठक घेत आगामी गणेशोत्सवाच्या पार्श्वभूमीवर साथरोगावर नियंत्रण मिळवण्याच्या दृष्टीने तळापर्यंत जाऊन उपाययोजना करा, अशी तंबी दिली होती. या पार्श्वभूमीवर महापालिकेने घरोघरी जाऊन साथरोगाशी संबंधित रुग्णांचा शोध घेण्याबरोबरच पाणीसाठा तपासणी, धूर फवारणी व जनजागृतीसाठी वेग दिला आहे. मलेरिया विभागाने ऑगस्टमध्ये ८७ हजार ३० घरांना भेटी दिल्या आहेत. त्यापैकी १९४१ घरात डेंग्यूच्या अळ्या सापडल्या आहेत.
खासगी रुग्णालयांची चांदी
महापालिकेच्या रेकॉर्डवर डेंग्यू व स्वाइन फ्लूबाधित व संशयित रुग्णांची संख्या कमी दिसत असली तरी शहरातील सर्व खासगी रुग्णालयांमध्ये सर्वाधिक रुग्ण हे डेंग्यू, स्वाइन फ्लू आणि तापाचे आहेत. एवढ्या रुग्णांवर उपचार करणे सरकारी रुग्णालयांमध्ये शक्य नसल्याने खासगी रुग्णालयांची सध्या चांदी सुरू आहे. रुग्णसंख्या दिवसेंदिवस वाढत असल्याने महापालिकेकडून शहरात उद्रेक होईल म्हणून या रुग्णालयांच्या आकड्यांकडे कानाडोळा केला आहे. त्यामुळे 'तेरी भी चूप मेरी भी चूप' असा पवित्रा स्वीकारला गेला आहे.