मला गरबा का खेळू दिला नाही? झोपेतून उठवत दोघांवर हल्ला; एकाचा मृत्यू, दुसरा जखमी

नवी मुंबई: नवी मुंबईतील रबाळे एमआयडीसी परिसरातील साईबाबा नगरात गरब्यावरून झालेल्या वादात एकाचा मृत्यू झाला आहे. तर अन्य एक जण जखमी झाला आहे. त्याच्यावर रुग्णालयात उपचार सुरू आहेत. हल्लेखोराला रबाळे एमआयडीसी पोलिसांनी अटक केली आहे.

साईबाबा नगरात गरब्याचे आयोजन करण्यात आले होते. नवरात्रीच्या पहिल्या दिवशी म्हणजेच २६ सप्टेंबरला स्थानिक रहिवासी गरबा खेळत असताना येथेच राहणारा आरोपी जितेंद्र पटवादेखील गरबा खेळण्यासाठी आला. मात्र जितेंद्र पटवा हा आक्षेपार्ह अंगविक्षेप करत नाचत असल्याचे पाहून आकाश जयस्वाल व त्याचा मित्र रशीद खान यांनी जितेंद्रला याठिकाणी दांडिया खेळू नको असे सांगत गरब्यामधून जाण्यास सांगितले.
माझ्या लेकीचं अपहरण झालंय! बापानं पोलीस ठाणं गाठलं, पण सगळा बनाव उघडा पडला
याचाच राग मनात ठेऊन आरोपी जितेंद्रने रात्री नवरात्री मंडळाच्या बाहेरील आवारात झोपलेल्या आकाश जयस्वाल व राशीद खान यांना शिवीगाळ करत उठवले. मला गरबा का खेळू दिला नाही, असा जाब विचारत सोबत आणलेल्या हातोड्याने पटवाने दोघांवर हल्ला केला. या हल्ल्यात दोघेही जखमी झाले. आकाश जयस्वाल याचा उपचारा दरम्यान मृत्यू झाला असून राशीद खान हा जखमी असून त्याच्यावर उपचार सुरु आहेत. रबाळे एमआयडीसी पोलिसांनी आरोपीला अटक केली आहे.