नांदेड : जिल्हा बँकेच्या संचालकपदाचे आरक्षणपदाची सोडत पार पडली. या सोडतीचा विद्यमान अध्यक्षानाच फटका बसला आहे. नांदेड तसेच हिमायतनगर गटातून आता महिलांना संधी मिळणार आहे.
नांदेड जिल्हा बँकेच्या संचालकपदाची निवडणूक आगामी काळात होणार आहे. २१ सदस्य असलेल्या संचालकांमध्ये दोन जागा महिलांसाठी राखीव आहेत. यापूर्वी जिल्हा बँकेवर धर्माबाद व माहूर तालुक्यातून महिला सदस्यांना संधी मिळाली होती. हे दोन तालुके वगळून शनिवारी प्राथमिक कृषी पतपुरवठा व कार्यकारी सोसायटी मतदारसंघासाठी आरक्षण काढण्यात आले. या मतदारसंघातून १६ सदस्य निवडले जातात. यात नांदेडसह हिमायतनगर तालुका महिलांसाठी राखिव झाला आहे. दोन जागासाठी काढण्यात आलेल्या आरक्षणाचा फटका बँकेचे विद्यमान अध्यक्ष डॉ. सुनील कदम यांना बसला आहे. डॉ. कदम जिल्हा बँकेवर कृषी पतपुरवठा व कार्यकारी सोसायटी मतदारसंघातून निवडून आले आहेत. अध्यक्षपद भुषविताना त्यांनी निवडणूकीची तयारी केली होती पण आता त्यांना घरी बसण्याची वेळ आली आहे.
विद्यमान संचालकापैकी अनेकांनी निवडणुकीची तयारी चालू केली आहे. शनिवारच्या आरक्षण सोडतीनंतर अनेकांची धाकधूक संपली आहे. कोणत्याही परिस्थितीत बँकेवर विजय मिळवण्यासाठी सर्वच पक्षाच्या इच्छूकांनी मोर्चीबांधणी सुरू केली आहे. लोकसभा व त्या पाठोपाठ झालेल्या विधानसभा निवडणुकीनंतर जिल्ह्यातील राजकीय वातावरण पूर्णतः बदलले आहेत. त्यामुळे कोणाचे पॅनल तयार होते आणि त्यात कोणाला संधी मिळते. हे आगामी काळात स्पष्ट होणार आहे.