म. टा. वृत्तसेवा, पनवेल
तळोजा एमआयडीसीतील पेंधर गावच्या परिसरात आलेल्या बिबट्याला पकडण्यासाठी शनिवारी विशेष शोधमोहीम राबवूनही वनविभागाच्या हाती काहीच लागलेले नाही. निसर्गप्रेमी सामाजिक संस्था आणि वनविभागाच्या पथकाने पेंधर गावाचा परिसर पिंजून काढूनही या बिबट्याचा शोध लागलेला नाही.
तळोजा एमआयडीसीतील पेंधर गावाच्या हद्दीत असलेल्या कोलटेन कंपनीच्या आवारात बिबट्याचा वावर असल्याचे सीसीटीव्हीमुळे उजेडात आले. काही दिवसांपूर्वी कंपनीच्या आवारात बिबट्या आल्याची घटना गुरुवारी उघडकीस आली. बिबट्या सीसीटीव्हीत दिसल्यापासून तळोजा औद्योगिक परिसरात भीतीचे वातावरण निर्माण झाले आहे. शुक्रवारी सायंकाळपर्यंत शोध घेऊनही बिबट्याचा शोध न लागल्यामुळे वनपरिक्षेत्र अधिकारी ज्ञानेश्वर सोनावणे यांनी शनिवारी बिबट्याला शोधण्यासाठी विशेष शोधमोहीम राबविण्याचे ठरविले होते. त्याप्रमाणे शनिवारी सकाळी साडेसहा वाजल्यापासून वनविभागाच्या ३५ जणांच्या सहा वेगवेगळ्या टीम बिबट्या शोधण्याच्या कामाला लागल्या होत्या. पेंधर गावाजवळच्या शांततेच्या परिसरात प्रवेश करण्यापूर्वी ड्रोनच्या सहाय्याने बिबट्यापर्यंत पोहोचण्याचा प्रयत्न केला, मात्र ड्रोन कॅमेरात तपास लागत नाही, असे लक्षात आल्यानंतर वनविभागाच्या टीमने हा परिसर पिंजून काढण्यास सुरुवात केली. १८ किलोमीटरच्या या परिसरात शोध घेण्यासाठी आठ निसर्गमित्रांचीही मदत घेण्यात आली होती. सकाळी साडेसहा वाजता सुरू झालेली ही शोधमोहीम दुपारी दीड वाजल्यापासून सुरू होती, मात्र सर्व परिसर पिंजून काढूनही तपास न लागल्यामुळे शोधमोहीम थांबविण्यात आल्याचे वनविभागाकडून सांगण्यात आले. मानवी वस्तीचा परिसर असल्यामुळे बिबट्याचा शोध घेण्यासाठी वनविभागाने ही शोधमोहीम हाती घेतली असल्याचे वनविभागाचे म्हणणे आहे.
कोणावरही हल्ला नाही
बिबट्याचा वावर या परिसरात असता तर मागील दोन ते तीन दिवसांत बिबट्याने भुकेमुळे कोणाची शिकार केली असती. मात्र वनविभागाच्या शोधमोहिमेत कोणाची शिकार केल्याचाही काही पुरावा आढळला नाही. शिवाय, बिबट्याचा वावर असलेल्या परिसरात कुत्र्यांच्या हालचाली बदललेल्या पहायला मिळतात. मात्र पेंधर आणि गाव परिसरात कुत्र्यांच्या हालचाली बदललेल्या नव्हत्या, त्यामुळे बिबट्या पुन्हा जंगलात गेला असावा, अशी शंका वनपरिक्षेत्र अधिकारी ज्ञानेश्वर सोनावणे यांनी व्यक्त केली आहे. तरीदेखील खबरदारी म्हणून नागरिकांनी सावधानता बाळगण्याचे आवाहन वनविभागाने केली आहे.