'पदवीधर'साठी शिवसेना उमेदवारीबदलाच्या पवित्र्यात
म. टा. विशेष प्रतिनिधी, मुंबई
विधान परिषदेच्या मुंबई पदवीधर मतदारसंघ निवडणुकीसाठी शिवसेनेने राज्याचे आरोग्यमंत्री डॉ. दीपक सावंत यांना उमेदवारी न देण्याचा निर्णय घेतल्याचे समजते. त्यांच्याऐवजी बोरिवलीचे विभागप्रमुख विलास पोतनीस यांना विधान परिषद उमेदवारी देण्याचा निर्णय झाल्याचे खात्रीलायक सूत्रांनी सांगितले.
राज्याच्या मंत्रिमंडळात कॅबिनेटमंत्री असलेले डॉ. सावंत तीनवेळा विधान परिषदेवर निवडून आले होते. शिवसेनेने विधान परिषदेतील सुभाष देसाई, दिवाकर रावते तसेच डॉ. सावंत अशा तीन आमदारांना मंत्रिपदे दिल्याने विधानसभेतील ज्येष्ठ आमदारांनी गेल्या काही महिन्यांपासून शिवसेना पक्षप्रमुख उद्धव ठाकरे यांच्याकडे नाराजीचा सूर आळवला होता. परिषदेतील मंत्री काम करीत नसल्याचाही त्यांनी आक्षेप नोंदवला होता. आगामी लोकसभा तसेच विधानसभा निवडणुका पाहता शिवसेना नेतृत्वालाही काही बदल करायचे होते. त्यात डॉ. सावंत यांच्या आमदारकीची टर्मही संपत होती. गेल्या तीन महिन्यांपूर्वीच डॉ. सावंत यांनी, 'आपल्याऐवजी इतरांना उमेदवारी द्यायची असेल तर द्यावी', अशी इच्छा व्यक्त केली होती. या सर्व पार्श्वभूमीवर डॉ. सावंत यांच्याऐवजी पोतनीस यांना उमेदवारी देण्याचा निर्णय उद्धव ठाकरे यांनी घेतल्याचे कळते. विभागप्रमुख असलेले पोतनीस हे लोकाधिकार समितीचे गेली अनेक वर्षे ज्येष्ठ पदाधिकारी म्हणून काम पाहत आहेत. डॉ. सावंत यांच्यापाठोपाठ आणखी दोन ज्येष्ठ मंत्र्यांनाही मंत्रिपदावरून दूर करीत पक्षसंघटनेची जबाबदारी देण्याबाबत पक्षात गांभीर्याने विचार सुरू असल्याचे कळते.