न्यू मेरिटाइम कामगार संघटनेचे यश
म. टा. वृत्तसेवा, पनवेल
उरण येथील सिंगापूर पोर्ट या खासगी कंपनीत काम करणाऱ्या १८५ चालकांची पगारवाढ करण्यात आली आहे. यासाठी न्यू मेरिटाइम अॅण्ड जनरल कामगार संघटनेने लढा दिला होता. परदेशी कंपनी असलेल्या सिंगापूर पोर्टमधील कामगारांना करण्यात आलेली पगारवाढ आणि अन्य सोयीसुविधांना देण्यात आलेली मान्यता म्हणजे मोठे यश मानले जात आहे.
परदेशी मालकीची असलेली ही कंपनी कामगार कायद्याच्या नावाखाली कामगारांची कमी पगारात पिळवणूक करीत होती, असे कामगार संघटनेचे म्हणणे होते. पोर्टमध्ये विविध वाहनांवर चालक म्हणून काम करणाऱ्या कामगारांची न्यू मेरिटाइम संघटनेच्या माध्यमातून पगारवाढीसह अन्य मागण्यांविषयी चर्चा सुरू होती. अखेर कामगारांना किमान वेतनाप्रमाणे १८ हजार रुपये पगार, दरवर्षी मूळ पगाराच्या पाच टक्के पगारवाढ, ८.३३ टक्के बोनस, हजेरी बोनस ५० रुपये प्रती शिफ्ट, वर्षातून ३६ सुट्ट्या, जादा काम केल्यास इन्सेटिव्ह आदी मागण्या मान्य करण्यात आल्या. 'आटीएफ लंडन' या आंतरराष्ट्रीय कामगार संघटनेचे उपाध्यक्ष म्हणून काम करणाऱ्या महेंद्र घरत यांच्या नेतृत्वाखाली आंतरराष्ट्रीय कंपनीच्या प्रशासनावर दबाव टाकून हा करार यशस्वी झाल्याचे बोलले जात आहे. महेंद्र घरत यांच्या उपस्थितीत पार पडलेल्या कराराप्रसंगी संघटनेचे कार्याध्यक्ष पी. के. रमण, कंपनी व्यवस्थापनाकडून संचालक संजय पोतदार, व्यवस्थापक पंढरीनाथ गंजावे, जयवंत आडिवडेकर आदींसह कामगार उपस्थित होते.