म. टा. प्रतिनिधी, मुंबई
आगामी विधानसभा निवडणुकांच्या पार्श्वभूमीवर मुंबई विभागीय काँग्रेसचे कार्यकारी अध्यक्ष म्हणून नियुक्त करण्यात आलेले काँग्रेसचे ज्येष्ठ नेते, माजी खासदार एकनाथ गायकवाड हे उद्या, रविवारी आपल्या पदाचा कार्यभार पक्षाच्या आझाद मैदानातील कार्यालयात स्वीकारणार आहेत, अशी माहिती मुंबई काँग्रेसतर्फे देण्यात आली.
मुंबई काँग्रेसचे अध्यक्ष मिलिंद देवरा आणि अन्य नेत्यांच्या उपस्थितीत हा कार्यक्रम होईल. आगामी काळात आमदारकी शाबूत ठेवण्यासाठी मुंबईतील काँग्रेसचे दोन आमदार हे सत्ताधाऱ्यांच्या छावणीत दाखल होण्याची शक्यता असल्याची काँग्रेस गोटात चर्चा आहे. एका माजी महापौराने विधानसभा निवडणुकीसाठी पक्षांतर करण्याचा बेत आखल्याची चर्चा आहे. तथापि, काँग्रेसच्या विचारांना मानणारा परंपरागत मतदार कायम टिकविण्यासाठी पक्षाचे निष्ठावंत समजले जाणारे एकनाथ गायकवाड यांची नियुक्ती करण्यात आली आहे. गायकवाड हे मुंबईतील कोणत्याही एका गटाशी संबंधित नसून, त्यांनी नेहमीच पक्षाच्या विचारांना प्रमाण मानून पक्ष वाढविण्यासाठी आपल्या परीने प्रयत्न केला आहे. त्यामुळे त्यांना मुंबईच्या कार्यकारी अध्यक्षपदावर आणल्याचे बोलले जाते.