१८ एप्रिल रोजी महासभा; आचारसंहिताभंग न करण्याचे दिले निर्देश
म. टा. खास प्रतिनिधी, नाशिक
लोकसभा निवडणुकीची आचारसंहिता सुरू असली तरी येत्या १८ एप्रिल रोजी महापालिकेची नियमित महासभा होणार आहे. जिल्हा निवडणूक शाखेच्या आचारसंहिता कक्षाने महापालिकेच्या नियमित महासभेला सशर्त परवानगी दिली आहे; परंतु लोकसभा निवडणुकीच्या आदर्श आचारसंहितेचा भंग होणार नाही, या अटीवर महासभा घेण्यास संमती देण्यात आली आहे. त्यामुळे महासभेत धोरणात्मक निर्णय घेता येणार नसून, केवळ इतिवृत्ताला मंजुरी दिली जाणार आहे.
महापालिकेची दर महिन्याला एक नियमित महासभा घेतली जाते. यात महिनाभरातील महत्त्वाच्या विषयांसह धोरणात्मक विषयांवर निर्णय घेतले जातात; परंतु सध्या लोकसभा निवडणुकीची आदर्श आचारसंहिता सुरू आहे. आदर्श आचारसंहिता लागू होऊन आता महिन्यापेक्षा जास्त कालावधी होत आला आहे. आणखी तीन आठवडे ती चालणार आहे. आचारसंहिता सुरू असतानाच गेल्या महिन्यात महापौर रंजना भानसी यांनी २० मार्च रोजीच्या महासभेचा अजेंडा १३ मार्चच्या वृत्तपत्रांमधून प्रसिद्ध केला होता. यामुळे आचारसंहितेचा भंग झाल्याची तक्रार हेमंत कानडे नामक व्यक्तीने निवडणूक शाखेकडे केली होती. आचारसंहिता कक्षाने या तक्रारीची दखल घेत महापालिकेला नोटीस बजावली होती. महापालिका कायद्यातील तरतुदींनुसार महापालिकेची नियमित सभा दर महिन्याच्या २० तारखेपर्यंत घेतली जाणे बंधनकारक आहे. त्यानुसारच सभा घेण्यात आली असून, या सभेत धोरणात्मक निर्णय घेण्यात आला नसल्याचा खुलासा महापालिकेला करावा लागला होता.
धोरणात्मक निर्णय घेता येणार नाही
एप्रिलच्या महासभेत अडचण येऊ नये, यासाठी महापालिकेच्या नगरसचिव विभागाने थेट निवडणूक शाखेकडे पत्र पाठवत नियमित महासभेकरिता परवानगी मागितली होती. जिल्हा निवडणूक शाखेकडून मार्गदर्शन प्राप्त न झाल्याने नगरसचिव कार्यालयातील प्रतिनिधींनी आचारसंहिता कक्षातील अधिकाऱ्यांची प्रत्यक्ष भेट घेत माहिती जाणून घेतली. या वेळी आचारसंहितेचा भंग होणार नाही, या अटीवर महासभा घेता येईल, असे आचारसंहिता कक्षातील अधिकाऱ्यांकडून सांगण्यात आले. त्यामुळे महापौर भानसी यांनी या महिन्यातील नियमित महासभा १८ एप्रिल रोजी बोलावली आहे; परंतु यात कोणतेही धोरणात्मक निर्णय घेता येणार नसल्याने ही महासभा औपचारिक ठरणार आहे.