मतदान न केल्यास वेतन कापणार; पनवेलच्या आयुक्तांची कर्मचाऱ्यांना तंबी

पनवेल :

मतदानासाठी सरकारने दिलेल्या सुट्टीचा उपयोग मतदानासाठी न केल्यास त्या दिवसाचा पगार कापण्यात येईल, अशी तंबी पनवेल महापालिकेचे आयुक्त गणेश देशमुख यांनी दिली आहे. मतदानासाठी दिलेल्या सुट्टीचा उपयोग मतदान करून नैतिक कर्तव्य पार पाडावे, अशी सक्ती आयुक्तांनी केली आहे.

मावळ लोकसभा मतदारसंघासाठी २९ एप्रिल रोजी मतदान होत आहे. प्रत्येक नागरिकाला मतदानाचा अधिकार बजावता यावा, यासाठी सरकारने सुट्टी जाहीर केली आहे. सरकारी कर्मचाऱ्यांनी केंद्र आणि राज्य सरकारच्या आदेशाचे तंतोतंत पालन करणे आवश्यक असून मतदानासाठी दिलेल्या सुट्टीचा उपयोग मतदानासाठीच व्हावा हा उद्देश आहे. पनवेल महापालिकेत काम करणाऱ्या कर्मचारी, अधिकारी आणि कंत्राटी कामगारांनी मतदानाचा हक्क बजावून सुट्टीचा उद्देश पूर्ण करावा, असे आवाहन करण्यात आले. महापालिकेतील सर्व कर्मचाऱ्यांनी मतदानाचा हक्क बजावला नाही तर त्यादिवसाचे वेतन कापण्यात येईल, असे सांगितले आहे. दिलेली सुट्टी शासकीय कामकाजाचा भाग आहे. मतदान करून महापालिकेतील संबंधित विभागाला मतदान केल्याची माहिती देण्याचीही सक्ती या परिपत्रकात केली आहे. महापालिकेत सध्या कंत्राटी कामगार, ग्रामपंचायतीचे कामगार मिळून सातशेपेक्षा अधिक कर्मचारी काम करतात.

केंद्र आणि राज्य सरकारच्या आदेशाप्रमाणे कर्मचाऱ्यांना मतदानासाठी पगारी सुट्टी देण्यात आली आहे. त्यामुळे सरकारी कर्मचाऱ्याने मतदान न केल्यास शिस्तभंग केल्यासारखे होईल. त्यामुळे मतदान न करणाऱ्या कर्मचाऱ्यांना कारवाईला सामोरे जावे लागेल.
- गणेश देशमुख, आयुक्त,पनवेल महापालिका