म. टा. विशेष प्रतिनिधी, मुंबई
मुंबई शहरातील सर्व पादचारी पूल, भूयारी मार्ग, स्कायवॉकची देखरेख व नियमित तपासणीसाठी नेमलेल्या तांत्रिक सल्लागार समितीचा कालावधी संपल्याने नवी समिती नेमली जाईपर्यंत जुन्या समितीलाच मुदतवाढ देण्याचा निर्णय महापालिकेने घेतला आहे. या कामासाठी जुनी समिती तयार असल्याचे समितीने कळवले आहे.
शहरात सुमारे ८१ पादचारी पूल, स्कायवॉक व भुयारी मार्ग आहेत. या वास्तूंच्या नियमित तपासणीसाठी पालिकेने खासगी तंत्रिक सल्लागारांची समिती नेमली आहे. या समितीत मे. टीपीएफ इंजिनीअरिंग, मे. टेक्नोजेम कन्सल्टंट, मे. स्ट्रककॉन डिझाइन्स, मे. श्रीखंडे कन्सल्टंट, कन्सट्रुमा कन्सल्टंट, कम्पोसिट कम्बाइन टेक्नोक्राफ्ट या सल्लागारांचा समावेश आहे. २४ ऑगस्ट, २०१६ ते २३ ऑगस्ट, २०१९ असा तीन वर्षांचा कालावधी या समितीकडे होता. तो संपला असून, नवीन समिती नेमणे आवश्यक आहे. मात्र तूर्तास याच समितीकडून काम करून घेतले जाणार आहे.
या समितीत डी. डी. देसाई असोसिएट्स इंजिनीअरिंग कन्सल्टंट अँड अॅनालिस्ट कंपनीचाही समावेश होता. मात्र हिमालय पूल दुर्घटना प्रकरणी या कंपनीवर कायदेशीर कारवाई सुरू असल्याने तिला वगळण्यात आले आहे. हिमालय पूल कोसळल्यानंतर शहरातील सर्व पुलांचे सर्वेक्षण करण्याचा निर्णय पालिकेने घेतला. ज्या पुलांची दुरूस्ती शक्य आहे, तिथे दुरुस्ती व जिथे पूल पाडणे शक्य असेल, तिथे नवा पूल उभारला जाणार आहे. आतापर्यंत शहर भागात सुमारे दहाहून अधिक जुने पादचारी पूल पाडण्यात आले असून, त्यापैकी मरिन लाइन्स येथील पुलांच्या उत्तर व दक्षिण बाजूचे काम लवकरच सुरू केले जाणार आहे.
कर्मचाऱ्यांची कमतरता
पालिकेत रस्ते व पूल विभाग एकत्रित काम करतो. अंधेरीचा गोखले पूल व त्यापाठोपाठ सीएसएमटी येथील हिमालय पूल कोसळल्याची दुर्घटना घडल्यानंतर पूल विभागावरील कामाचा ताण वाढला आहे. त्यातच पूल विभागात तांत्रिक कर्मचाऱ्यांची कमतरता मोठ्या प्रमाणात असल्याचे त्याचा परिणाम पूल विभागाच्या कामावर होत असल्याचे पालिकेने सल्लागारांना मुदतवाढ देण्यासाठी तयार केलेल्या प्रस्तावात स्पष्ट केले आहे.