दिव्यांग नोंदणीला मुदतवाढ

पनवेल : पनवेल महापालिकेने नगरपालिकेत असलेली दिव्यांगांची नोंदणी रद्द करून नव्याने नोंदणी करण्यास सुरुवात केली आहे. तसेच, नोंदणीसाठी याआधी २० जुलै असणारी मुदत १६ ऑगस्टपर्यंत वाढवण्यात आली आहे.

महापालिकेच्या एकूण बजेटमध्ये ठराविक रक्कम महापालिका क्षेत्रातील दिव्यांगांच्या कल्याणासाठी खर्च करणे अपेक्षित असते. पनवेल नगरपालिका असताना प्रशासनाने निधी खर्च न केल्यामुळे प्रहार अपंग संघटनेने वारंवार आंदोलने, लाक्षणिक उपोषणे केली होती. पनवेलची महानगरपालिका झाल्यानंतर आयुक्त सुधाकर शिंदे यांनी बेकायदा व्यावसायिकांवर कारवाई केली. दिव्यांगांवर निधी खर्च न करता महापालिका रस्त्यावर लहान व्यवसाय करणाऱ्यांवर कारवाई करत होती. कारवाई केल्यामुळे संतप्त दिव्यांगांनी आमदार बच्चू कडू यांच्या नेतृत्वाखाली मोर्चा काढला. यावेळी आयुक्त शिंदे यांनी आवश्यक निधी वापरण्यात येईल, असे आश्वासन दिले होते. त्याप्रमाणे महानगरपालिकेने नगरपालिकेच्या काळातील २५० दिव्यांगांची नोंदणी रद्द करून नव्याने नोंदणी करण्यास सुरुवात केली आहे. महापालिकेतून अर्ज घेऊन आवश्यक कागदपत्रे घेऊन दिव्यांगांनी नोंदणी करावी, असे आवाहन महापालिकेने केले आहे. २० जुलैपर्यंत दिलेली मुदत वाढवून १६ ऑगस्टपर्यंत वाढविण्यात आली आहे.