माथेरानमध्ये पर्यटकांची लूट

संतोष दळवी, कर्जत

मुंबई-पुण्यापासून जवळचे पर्यटनस्थळ म्हणून माथेरानला पर्यटक पहिली पसंती देत असून या पर्यटनस्थळाकडे पर्यटकांचा ओघ दिवसेंदिवस वाढत आहे. माथेरानमध्ये वाहनांना बंदी असताना येथे घोडा आणि हातरिक्षा ही प्रमुख वाहने आहेत. परंतु येथील घोडेवाले माथेरानबाहेरील परिसरातील असून ते पर्यटकांकडून अवाजवी दर आकारून पर्यटकांची आर्थिक लूट करत आहेत.

मे महिना म्हणजे माथेरानचा प्रमुख पर्यटन हंगाम. या हंगामात जिते, जुम्मापटी, गारबट, नेरळ, भडवळ येथील घोडेवाले आपला उदरनिर्वाह करण्यासाठी माथेरानमध्ये येतात. परंतु येथील पो‌लिस प्रशासनाचा घोडेवाल्यांवर अंकुश नसल्याने घोडेवाले अवाजवी दर आकारून पर्यटकांना लुटत आहेत. माथेरानमधील घोडा हे प्रमुख वाहन असून या घोड्यांची पासिंग पोलिस प्रशासनामार्फत केली जाते. या घोडेवाल्यांवर अंकुश ठेवण्याचे कामसुद्धा पोलिसांचे आहे. परंतु याकडे दुर्लक्ष होत आहे. तीन वर्षे आधी पोलिस व नगरपरिषद यांच्यातर्फे माथेरानमधील घोडेसफारीसाठी वाजवी दर आकारले जात होते व तसे फलकही महत्त्वाच्या ठिकाणी लावले होते. परंतु या मोसमात येथे असे काही दिसून येत नाही. पर्यटकांनी माथेरानच्या निसर्गसौंदर्याबद्दल काही विचारले, तर सरळ माथेरानमध्ये पाहण्यासारखे काहीही नसून माथेरानच्या हॉटेलवाल्यांना ५ हजार रुपये देण्यापेक्षा आम्हाला ३ हजार रुपये द्या. तुम्हाला ५ पॉइंट फिरवून पुन्हा टॅक्सी स्टॅण्डला आणून सोडतो, असे सांगितले जात असल्याच्या तक्रारी पर्यटक करतात. येथील घोडेवाल्यांनी अनधिकृत दरफलक लावला असून पर्यटकांची दिशाभूल करून त्यांची आर्थिक फसवणूक होत आहे, असा आरोपही केला जात आहे.

ही आर्थिक लूट थांबवण्यासाठी नगरपरिषद व पोलिस प्रशासन यांनी एकत्रित येऊन सर्व महत्त्वाच्या ठिकाणी दरफलक लावून पर्यटकांना सोयीसुविधा चांगल्या पद्धतीने पुरवण्याची गरज व्यक्त होत आहे.

येथील रेल्वे स्टेशनबाहेर असलेल्या घोडेवाल्यांना मला दस्तुरी येथे जायचे आहे, असे सांगितले असता मला कोणीही घोडा दिला नाही. शेवटी नाईलाजास्तव हे तीन किमी अंतर मला चालून पार करावे लागले.

- संतोष ठाकूर, पर्यटक

घोडेवाल्यांची मुजोरी रोखण्यासाठी पोलिसांनी घोडेवाल्यांवर कारवाई केली पाहिजे. नगरपालिकेच्या माध्यमातून घोडेवाल्यांवर कसा अंकुश ठेवता येईल, यावर विचारविनिमय करून पर्यटकांना दिलासा देऊ.

- आकाश चौधरी,

उपनगराध्यक्ष, माथेरान