म. टा. खास प्रतिनिधी, मुंबई
प्रॉक्टर अँड गॅम्बल या बहुराष्ट्रीय कंपनीच्या 'जिलेट' या उत्पादनांची बनावट उत्पादने तयार करून त्यांची विक्री करणाऱ्या नऊ बड्या विक्रेत्यांना मुंबई गुन्हे शाखेच्या पथकांनी अटक केली आहे. मुंबईमध्ये दहा ठिकाणी छापे टाकून लाखो रुपयांची बनावट उत्पादने जप्त करण्यात आली.
'जिलेट'च्या नावाने बनावट उत्पादनांची विक्री होत असल्याच्या अनेक तक्रारी कंपनीकडे येत होत्या. यामुळे कंपनीला आर्थिक नुकसान सहन करावे लागत होते. याची दखल घेत 'प्रॉक्टर अँड गॅम्बल' या कंपनीच्या कायदेशीर सल्लागारांनी अंधेरीच्या डी.एन. पोलिस ठाण्यात तक्रार केली. याप्रकरणात प्राथमिक चौकशी करून फसवणूक, कॉपीराइट कायदा तसेच ट्रेडमार्क कायद्याखाली गुन्हा दाखल करण्यात आला. मुंबईभर ठिकठिकाणी बनावट उत्पादने विकली जात असल्याने गुन्हे शाखेने तपास सुरू केला. सहायक पोलिस आयुक्त संजय कदम यांच्या मार्गदर्शनाखाली वरिष्ठ पोलिस निरीक्षक सुनील बाजारे, रहिमतुल्ला सय्यद, संतोष गायकर, धीरज कोळी, सहायक निरीक्षक लक्ष्मीकांत साळुंखे यांची पथके तयार करण्यात आली.
गुन्हे शाखेच्या पथकांनी एकाच वेळी क्रॉफर्ड मार्केट आणि अंधेरीच्या सुपर शॉपिंग सेंटरमधील दहा गोदामांवर छापे टाकले. या ठिकाणी लाखो रुपयांचा बनावट उत्पादनांचा साठा हाती लागला. याप्रकरणी पंकज निसर, मांगीलाल चौधरी, पंकज जैन, बदर आलम शेख, नासिर मियाँ शेख, इफ्तेखार आलम, तबरेज आलम शेख, मोहम्मद आरिफ शेख, प्रवीण फूलवाला या नऊ जणांना पोलिसांनी अटक केली.