म. टा. प्रतिनिधी, फुलंब्री
महालकिन्होळा (फरशी) येथील एका शेतकऱ्याने बुधवारी (चार डिसेंबर) विषारी औषध प्राशन करून आपली जीवनयात्रा संपवल्याची घटना सकाळी सहाच्या सुमारास घडली. याप्रकरणी वडोदबाजार पोलिस ठाण्यात अकस्मात मृत्यूची नोंद करण्यात आली आहे. उत्तम लक्ष्मण कापरे (४०) असे मृत शेतकऱ्याचे नाव आहे.
बीट जमादार सय्यद मुजीब यानी सांगितले की, या शेतकऱ्याने रागाच्या भरात काही तरी विषारी औषध प्राशन केले. सकाळी सहाच्या सुमारास त्यांच्या शेतात शेतकरी मृत अवस्थेत आढळला. त्यानंतर वडोदबाजार पोलिसांनी घटनास्थळी धाव घेऊन पंचनामा केला. त्यानंतर वडोदबाजार प्राथमिक आरोग्य केंद्रात पोस्टमार्टेम करण्यात आले. त्यांच्या आत्महत्येचे नेमके कारण समजू शकलेले नाही. दुपारी त्यांच्यावर अंत्यसंस्कार करण्यात आले.
दरम्यान, शेतकऱ्यावर सोसायटीसह राष्ट्रीयकृत बँकेचे कर्ज असल्याची माहिती नातेवाईकांनी दिली. कर्ज कसे फेडायचे, याची ते नेहमी चिंता करीत होते. याच कारणामुळे त्यांनी आत्महत्येसारखे टोकाचे पाऊल उचलल्याची माहिती त्यांच्या नातेवाईकांनी दिली. त्यांना जेमतेम तीन एकर शेती असून, ते शेतीसह इतर बाहेरील कामे करून कुटुंबाचा उदरनिर्वाह चालवत. त्यांच्या मागे वडील, पत्नी, दोन मुले असा परिवार आहे.