नवी मुंबईत केमिकल कंपनीला आग, ३ जखमी

नवी मुंबई: जुईनगर येथील एमआयडीसीत असलेल्या मोडेको इंडिया प्रायव्हेट लिमिटेड या केमिकल कंपनीला भीषण आग लागली आहे. यात कंपनीचे तीन कामगार जखमी झाले आहेत. घटनेची वर्दी मिळताच वाशी अग्निशमन दलाच्या सात ते आठ गाड्या घटनास्थळी दाखल झाल्या. ही आग विझवण्याचे अग्निशमन दलाच्या जवानांचे शर्थीचे प्रयत्न सुरू आहेत.

या आगीत जखमी झालेल्या कामगारांवर पालिका रुग्णालयात उपचार सुरु आहेत.

ही आग इतकी भीषण आहे की, आगीचे लोट खारघर ते वाशी परिसरातूनही सहज दिसत आहेत. ही आग आसपासच्या परिसरात पसरण्याची शक्यता लक्षात घेत जवळच्या कारखान्यांमधील कामगारांना घरी सोडून देण्यात आले आहे.

ही आग नेमकी कशामुळे लागली हे अद्याप स्पष्ट होऊ शकलेले नाही.