म. टा. वृत्तसेवा, नवी मुंबई
नेरूळमधील डी. वाय. पाटील विद्यापीठाच्या आवारात बांधकाम सुरू असलेल्या इमारतीच्या चौथ्या मजल्यावर दुपारी १२ वाजण्याच्या सुमारास आग लागल्याची घटना घडली. नवी मुंबई महापालिकेची अग्निशमन दलाची गाडी पोहचण्यापूर्वी तिथे कामावर कार्यरत असणाऱ्या कामगारांनी माती टाकून आग विझविण्याचा प्रयत्न केल्याने आग सर्वत्र पसरली नाही. त्यामुळे जीवितहानी टळली. येथे पसरलेल्या थर्माकोल आणि प्लायवूडमुळे आग फार मोठ्या प्रमाणात भडकली होती. आगीच्या ज्वाळा इमारतीमधून बाहेर पडत होत्या. त्यामुळे परिसरात एकच घबराट पसरली.
नेरूळमधील डी. वाय. पाटील विद्यापीठाच्या परिसरात, दोन रुग्णालय, कॉलेज, वसतिगृह, स्टेडियम, अशा अनेक इमारती आहेत. विद्यापीठाचा परिसर नेहमीच गर्दीने गजबजलेले असतो. यामध्ये एका सहा मजली इमारतीचे बांधकाम सुरू आहे. या इमारतीच्या चौथ्या मजल्यावर दुपारी साडेबारा वाजण्याच्या सुमारास आग लागल्याची घटना घडली. प्लायवूड आणि थर्मकोल असल्याने आग वेगाने पसरली. त्यामुळे परिसरातील नागरिकांमध्ये भीतीचे वातावरण निर्माण झाले. येथे कामावर असलेल्या कामगारांनी प्राथमिक उपाय म्हणून कामासाठी आलेली माती टाकून आग विझविण्याचा प्रयत्न सुरू केला होता. त्यानंतर नेरूळ आणि बेलापूर अग्निशमन दलाच्या गाड्या घटनास्थळी पोहोचल्या. अग्निशमन दलाच्या जवानांनी एका तासात आग आटोक्यात आणली. आगीचे कारण समजू शकले नाही. अधिक माहिती घेऊन आग लागल्याच्या कारणांचा शोध घेतला जाईल, अशी माहिती नेरूळ अग्निशमन केंद्राच्या वतीने देण्यात आली.