बेकायदा गुटखाविक्रीप्रकरणी पाच जणांना अटक

म. टा. वृत्तसेवा, नवी मुंबई

एपीएमसीतील भाजी आणि मसाला मार्केटमध्ये बेकायदा गुटखाविक्री करणाऱ्या चार पान टपऱ्यांवर नवी मुंबई पोलिसांच्या अंमली पदार्थ विरोधी पथकाने छापा मारून गुटख्याची विक्री करणाऱ्या चार टपरी चालकांसह त्यांना गुटख्याचा माल पुरविणाऱ्या एकूण पाच जणांना अटक केली आहे. या कारवाईत पोलिसांनी सुमारे ४२ हजार रुपये किमतीचा गुटखा जप्त करून हा गुटखा अन्न व औषध प्रशासनाकडे पुढील कारवाईसाठी सोपविला आहे.

महाराष्ट्रामध्ये गुटखा विक्री करण्यासाठी बंदी असतानाही एपीएमसी मार्केटमधील पानटपरी चालकांकडून सर्रास गुटखा विकण्यात येत असल्याची माहिती नवी मुंबई पोलिसांच्या अंमली पदार्थ विरोधी पथकाला मिळाली होती. त्यानुसार वरिष्ठ पोलिस निरीक्षक राजेंद्र बुधवंत यांच्या मार्गदर्शनाखाली सहाय्यक पोलिस निरीक्षक मुटकुळे व त्यांच्या पथकाने शुक्रवारी सांयकाळी एपीएमसीतील भाजी आणि मसाला मार्केटमध्ये असलेल्या पान टपऱ्यांवर छापे मारून त्यांची तपासणी केली. यावेळी चार टपरीचालक गुटखा विक्री करताना आढळून आले. त्यामुळे पोलिसांनी गुटखाविक्री करणाऱ्या व त्यांना गुटख्याचा माल पुरविणाऱ्या मुस्ताक मोहम्मद अन्वारल (२२), राजनकुमार गौरीशंकर गुफ्ता (४४), धर्मेंद्र जगदीश शहा (२४), मोहन गोपाल पाल (१९) आणि प्रमोदकुमार आर्य (२०) या पाच जणांना अटक केली.

या कारवाईत पोलिसांनी राज निवास फ्लेवर्ड पान मसाला, आरएमडी गुटखा, रजनीगंधा पानमसाला, राजश्री पानमसाला, गोवा १००० गुटखा, महक पानमसाला, एसएचके पान मसाला, विमल पान मसाला, सुधा प्लस पानमसाला आदी गुटख्याचा सुमारे ४२ हजार रुपये किमतीचा साठा जप्त केला. एपीएमसी पोलिस ठाण्यात अन्न सुरक्षा आणि मानके अधिनियमानुसार गुन्हा दाखल करण्यात आला असून अटक करण्यात आलेल्या पाचही जणांना न्यायालयाने मंगळवारपर्यंत पोलिस कोठडी ठोठावली आहे.