पाच बालकामगारांची सुटका

नवी मुंबई : नवी मुंबई पोलिसांच्या अनैतिक मानवी वाहतूक प्रतिबंध कक्षाने कामगार उपायुक्त कार्यालयाच्या सहकार्याने मंगळवारी उरण भागामध्ये वेगवेगळ्या ठिकाणी धाड टाकून पाच बालकामगारांची सुटका केली. या कारवाईत बालकामगारांना रावबून घेणाऱ्या पाच दुकानदारांवर न्हावा-शेवा पोलिस ठाण्यात गुन्हे दाखल करण्यात आले असून पोलिसांनी त्यांना ताब्यात घेतले आहे. सुटका करण्यात आलेल्यांपैकी दोन मुले उत्तरप्रदेश तर अन्य तीन मुले बिहार, मध्यप्रदेश आणि राजस्थान येथील आहेत. या मुलांना बालकल्याण समितीमार्फत त्यांच्या आई-वडिलांच्या ताब्यात देण्यात येणार असल्याची माहिती वरिष्ठ पोलिस निरीक्षक आनंद चव्हाण यांनी दिली.

मंगळवारी उलवे सेक्टर १८ व सेक्टर ८ परिसरामध्ये केलेल्या कारवाईत पोलिसांच्या पथकाला तेथील केजीएन टायर्स, शिवशक्ती भोजनालय, मुरुगन स्नॅक्स, जगदंबा वडापाव सेंटर आणि भाजीपाला विक्री दुकान या दुकानांमध्ये बाल कामगारांना ठेवण्यात आल्याचे आढळून आले. तसेच, हा दुकानदार बालकामगारांकडून कमी वेतनात अतिश्रमाचे काम करवून घेऊन, त्यांचे आर्थिक, मानसिक व शारीरिक शोषण करत असल्याचे आढळून आले. याप्रकरणी मोहम्मद शाहीद मोहम्मद जाहीद, भिमा भोलानाथ, शिवरामन मुरुगन यादव, राजीत सियाराम यादव, मोहम्मद अनारुल अब्दुल बिलाल शेख या पाच जणांना ताब्यात घेतले आहे.