माजी नगरसेवकाची दिघ्यात आत्महत्या

नवी मुंबई : दिघा भागातील माजी नगरसेवक भोलानाथ ठाकूर (५२) यांनी शुक्रवारी पहाटे गणपती पाडा येथील आपल्या राहत्या घरात गळफास घेऊन आत्महत्या केली. या आत्महत्येमागचे कारण अद्याप स्पष्ट झाले नसल्याचे पोलिसांनी सांगितले.

भोलानाथ ठाकूर हे दिघा भागातील गणपती पाडा परिसरात कुटुंबासह राहत होते. गुरुवारी रात्री जेवल्यानंतर ते आपल्या खोलीमध्ये झोपण्यासाठी गेले होते. शुक्रवारी सकाळी उशिरापर्यंत त्यांनी आपल्या खोलीचा दरवाजा न उघडल्याने, सकाळी त्यांच्या मुलांनी दरवाजा तोडला. त्यावेळी भोलानाथ ठाकूर हे खोलीत गळफास घेतलेल्या स्थितीत आढळून आले. या घटनेची माहिती मिळताच कळवा पोलिसांनी घटनास्थळी धाव घेतली. भोलानाथ ठाकूर यांनी आत्महत्या का केली, हे अद्याप स्पष्ट झाले नसल्याचे पोलिसांनी सांगितले. भोलानाथ ठाकूर हे दिघा भागातील प्रभाग क्र.१चे माजी नगरसेवक होते. काही दिवसांपूर्वीच त्यांनी राष्ट्रवादी काँग्रेस पक्षातून शिवसेनेत प्रवेश केला होता. कळवा पोलिस या घटेनचा अधिक तपास करत आहेत.