'एमसीव्हीसी'च्या प्रवेशाचा मार्ग मोकळा
म. टा. विशेष प्रतिनिधी, मुंबई
'एमसीव्हीसी' अभ्यासक्रम पूर्वीप्रमाणेच सुरू राहील, अशी ग्वाही देत कौशल्य विकास व उद्योजकतामंत्री संभाजीराव पाटील निलंगेकर यांनी या अभ्यासक्रमाच्या विसर्जनाचा कोणताही आदेश निर्गमित होणार नसल्याचे शुक्रवारी सांगितले. सन २०१८-१९ या शैक्षणिक वर्षात नियमितपणे इयत्ता अकरावीचे प्रवेश होतील, असेही स्पष्ट केले. यामुळे इयत्ता अकरावी व्यवसाय अभ्यासक्रमाच्या प्रवेशाचा मार्ग मोकळा झाला आहे.
'एमसीव्हीसी'चे विसर्जन आयटीआय किंवा व्होकेशनल ट्रेनिंग इन्स्टिट्यूटमध्ये करण्याचा घाट प्रशासनाने घातला होता. यामुळे या क्षेत्रातील कर्मचारी, शिक्षक व संबंधित विद्यार्थी-पालक यांच्यात संभ्रम निर्माण झाला होता. आपल्या नोकरीवर गदा येणार याची शिक्षकांना धास्ती वाटत होती. कौशल्य विकास व उद्योजकता विभागाचे प्रधान सचिव असीम गुप्ता यांनी कर्मचारी संघटनांसोबत चर्चा करताना मुंबईत स्पष्टपणे या अभ्यासक्रमाच्या विसर्जनाबाबत आग्रही असल्याचे सांगितले होते. त्यामुळे कर्मचारी अधिकच हबकले होते. या पार्श्वभूमीवर महासंघाने अनेक आमदारांना निवेदने दिली होती. यानंतर कौशल्य विकासमंत्र्यांनी शुक्रवारी लातूर येथे महासंघाच्या पदाधिकाऱ्यांबरोबर चर्चा केली. महासंघ पदाधिकारी यांनी हे विसर्जन का करू नये, याबद्दलचे निवेदन मंत्र्यांना दिले. यावर निलंगेकर यांनी तत्काळ महासंघाचे पदाधिकारी यांना आश्वस्त करीत 'एमसीव्हीसी'चा अभ्यासक्रम पूर्वीप्रमाणेच सुरू राहील, अशी ग्वाही दिली.
लातूरमधील या बैठकीत मंत्र्यांनी अभ्यासक्रम विसर्जनास स्थगिती देत अकरावी प्रवेशाचा मार्ग खुला केल्याने या चर्चेला आता पूर्णविराम मिळाला आहे. या बैठकीस महासंघाच्या वतीने अध्यक्ष प्रा. शिवाजीराव बंडगर, महासचिव विद्याधर गोडबोले, मराठवाडा विभागीय अध्यक्ष संजय जगताप, लातूर जिल्हा अध्यक्ष प्रा. सुहास पाचपुते, सोलापूर जिल्हा अध्यक्ष प्रा. किरण गाढवे व सदस्य दत्ता सागरे उपस्थित होते.