पनवेलमध्ये पूर्णवेळ वैद्यकीय अधिकारी

म. टा. वृत्तसेवा, पनवेल

डॉ. सचिन जाधव यांची आठ महिन्यांपूर्वी राज्याचे आरोग्यमंत्री राजेश टोपे यांचे विशेष कार्यअधिकारी म्हणून नियुक्ती झाल्यानंतर रिक्त असलेल्या आरोग्य अधिकारीपदावर अखेर पूर्णवेळ अधिकारी मिळाला आहे. दोन दिवसांपूर्वी पनवेल महापालिकेच्या वैद्यकीय अधिकारी पदावर आनंद गोसावी यांची नियुक्ती झाली आहे.

चार वर्षांपूर्वी पनवेल महापालिकेची स्थापना झाल्यानंतर नागरिकांच्या आरोग्याच्या दृष्टीने अत्यंत महत्त्वाच्या वैद्यकीय अधिकारी नेमणूक केली जात नव्हती. काही काळ खासगी डॉक्टरांची, आरोग्य विभागातील अधिकाऱ्यांची प्रभारी म्हणून नियुक्ती अशा व्यक्तींवर चार्ज दिला देण्यात आला होता. या पदावर डॉ. सचिन जाधव यांची नियुक्ती करण्यात आली. मात्र राज्यात महाआघाडीची सत्ता येताच डॉ. जाधव यांना आरोग्यमंत्र्यांचे विशेष कार्यअधिकारी म्हणून पद देण्यात आल्यानंतर हे पद रिक्त होते. करोनासारख्या संकटात पनवेल महापालिकेचे हे पद रिक्त होते. या पदावर अधिकाऱ्याची नियुक्ती करावी, या मागणीसाठी महापालिका आयुक्त, महापौर यांच्यासह पनवेलमधील सामाजिक संस्था मागणी करीत होत्या. अखेर या पदावर आनंद गोसावी यांची नियुक्ती करण्यात आली. द्वितीय श्रेणीच्या अधिकाऱ्यांची नियुक्ती केल्यामुळे पनवेल महापालिकेच्या आरोग्य विभागाला बळ मिळेल, असे बोलले जात आहेत.

स्वतंत्र दालन नाही

द्वितीय श्रेणीच्या दर्जाचे पद असलेल्या वैद्यकीय अधिकाऱ्यांना बसण्यासाठी स्वतंत्र दालन देण्यात आले नव्हते. त्यांच्या दालनातच त्यांच्या विभागातील तीन डाटा एन्ट्री ऑपरेटर बसविले जात होते. डॉ. सचिन जाधव यांना स्वतंत्र दालन देण्यात आले नसल्यामुळेही ते नाराज होते. आरोग्य विभागाच्या कामाचा दर्जा सुधारायचा असेल तर व्यक्तीचा मान राखला जाईल, यासाठी प्रशासनाला प्रयत्न करावे लागणार आहेत.