वृद्धेची फसवणूक

नवी मुंबई : मुंबई-पुणे, सातारादरम्यान खासगी प्रवाशांची वाहतूक करणाऱ्या दुकलीने दिवाळी सणासाठी सातारा येथील मूळ गावी जाण्यासाठी निघालेल्या ६० वर्षीय वृद्धेला व तिच्या नातवाला आपल्या तवेरामध्ये बसवून त्यांच्या बॅगेतील ८ तोळे वजनाचे दागिने व ५१ हजारांची रोख रक्कम चोरली. या दुकलीविरोधात नेरुळ पोलिसांनी चोरीसह अपहरणाचा गुन्हा दाखल करून त्यांचा शोध सुरू केला आहे.

लीलाबाई मोरे (६०) या नेरुळमधील सेक्टर-१८ एमध्ये कुटुंबासह राहण्यास आहेत. दिवाळीनिमित्त त्या मूळगावी सातारा येथे जाण्यासाठी गुरुवारी दुपारी सायन-पनवेल मार्गावरील एलपी उड्डाणपुलाखालील बस स्टॉपवर आपल्या नातवासह आल्या होत्या. मात्र एसटी कर्मचाऱ्यांच्या आंदोलनामुळे एसटी सेवा बंद असल्याने लीलाबाई खासगी वाहनाने सातारा येथे जाण्यासाठी निघाल्या. यावेळी त्याठिकाणी आलेल्या एका तवेरा चालकाने लीलाबाई व त्यांच्या नातवाला प्रत्येकी २०० रुपयांमध्ये सातारा येथे नेण्याची तयारी दर्शवून त्यांना व पुणे येथे जाणाऱ्या इतर प्रवाशांना आपल्या तवेरामध्ये बसवून त्यांच्या बॅगा जीपच्या पाठीमागील भागात ठेवल्या. यावेळी दागिने व रोख रक्कम असलेली बॅगही लीलाबाईंनी दिली. याचदरम्यान चालकाच्या सहकाऱ्याने लीलाबाई यांच्या बॅगेतील दागिने आणि रोख रक्कम चोराने चोरली.