हापूस आंब्याची इटलीवारी

मनीषा ठाकूर-जगताप, नवी मुंबई

वाशीतील मुंबई कृषी उत्पन्न बाजार समितीमध्ये आता हापूस आंब्याची आवक वाढायला सुरुवात झाली असून बाजारात चांगल्या दर्जाचा आंबा यायला लागला आहे. आवक वाढली असल्याने आंब्याची निर्यातही सुरू झाली असून वाशीतील पणन मंडळाच्या विकिरण सुविधा केंद्रातून पहिल्यांदाच इटलीला हापूस आंबा रवाना झाला आहे. या आंब्यावर उष्णजल प्रक्रिया अर्थात 'हॉट वॉटर ट्रीटमेंट' करून हवाई मार्गाने हा १२०० किलो आंबा इटलीला रवाना झाला आहे.

आंब्याच्या या वर्षीच्या हंगामासाठी पणन मंडळाच्या वतीने वाशीतील विकीरण सुविधा व भाजीपाला प्रक्रिया केंद्रातून सुविधा पुरवण्यात येत आहेत. या सुविधेवरून या हंगामाची आंब्याची पहिली निर्यात फरीदाबाद येथील मे. दॅमोण या निर्यातदार कंपनीकडून करण्यात आली आहे.

कोकणातील हापूस आंब्याच्या निर्यातीला चांगली सुरुवात झाली आहे आणि हा हंगामही निर्यातीच्यादृष्टीने जाणार असल्याचा विश्वास फळे भाजीपाला निर्यातदार असोसिएशनचे उपाध्यक्ष इक्राम हुसैन यांनी व्यक्त केला आहे. आता ऑस्ट्रेलियासाठी १५ मार्चपासून तर अमेरिका व इतर देशांसाठी एक एप्रिलपासून या केंद्रातून विकिरण सुविधा सुरू केल्या जाणार आहेत. त्यामुळे या इतर देशांसाठीही आंब्याची निर्यात करणे निर्यातदारांना सोयीस्कर होणार आहे.

मानकांनुसार प्रक्रिया

कृषिमालाच्या निर्यातीसंदर्भात प्रतेक देशांची वेगवेगळी मानके ठरलेली आहेत. त्यामुळे त्या त्या नियमानाप्रमाणे फळांवर प्रक्रिया करून ती पाठवावी लागतात. या अनुषंगाने पणन मंडळाने आंब्याची निर्यात वाढावी, यासाठी आंतरराष्ट्रीय मानकांची पूर्ती करणारी उच्च तंत्रज्ञानावर आधारित विकीरण सुविधा वाशीत उभारली आहे. या सुविधेचा वापर करून २०१६ मध्ये आंबा व डाळींब या फळांची अमेरिका व ऑस्ट्रेलिया या विकसित देशांना सर्वप्रथम निर्यात करण्यात आली. यावेळी आंब्याच्या हंगामात १९० मे. टन व सन २०१७च्या आंबा हंगामात ४७१ मे. टन आंब्यावर प्रक्रिया करून अमेरिका व ऑस्ट्रेलियामध्ये आंब्याची निर्यात झालेली आहे.