नवी मुंबई पोलिसांचा उपक्रम
म. टा. वृत्तसेवा, पनवेल
हेल्मेट न घालता दुचाकी चालवून कायद्याचे उल्लंघन करणाऱ्या दुचाकीस्वारांकडून दंड वसूल करून कारवाई केली जाते. परंतु नवी मुंबई वाहतूक पोलिसांनी मंगळवारी अशा दुचाकीस्वारांवर कारवाई केलीच, परंतु त्यांना दंडाच्या पाचशे रुपयांच्या पावतीसोबत मोफत हेल्मेटदेखील हातात दिले.
नवी वाहतूक पोलिसांसाठी सुझुकी इंडिया प्रायव्हेट लिमिटेड कंपनीने विनाहेल्मेट दुचाकी चालविणाऱ्यांमध्ये हेल्मेटबाबत जनजागृती करण्यासाठी १ हजार हेल्मेट मोफत दिले आहेत. या हेल्मेटचे दुचाकीस्वारांना मोफत वाटप करण्यात यावे, हा त्यामागचा उद्देश आहे. याशिवाय वाहतूक पोलिसांसाठी विशेष पाच दुचाकीदेखील दिल्या आहेत. नवी मुंबईचे पोलिस आयुक्त संजय कुमार यांनी मोफत हेल्मेट देण्यापेक्षा हेल्मेटविना दुचाकी चालविणाऱ्या दुचाकीस्वारांवर कारवाई करून त्याला मोफत हेल्मेट द्यावे. जेणेकरून पुढच्यावेळी तो हेल्मेट वापरतील, असे आदेश दिले होते. त्यानुसार नवी मुंबई पोलिस आयुक्तालयातील खारघर आणि सीबीडी वाहतूक शाखेत मंगळवारपासून असा प्रयोग करण्यात आला.
वाहतूक पोलिस नेहमीप्रमाणे खारघर उड्डाणपुलाखाली हेल्मेटविना दुचाकी चालविणाऱ्यांना अडवून कारवाई करीत होते. मात्र कारवाई झाल्यानंतर त्यांच्या हातात नवेकोरे हेल्मेट दिले जात असल्यामुळे दुचाकीस्वारांना आश्चर्याचा धक्का बसला. सीबीडी येथील सायन-पनवेल महामार्गावरील पुलाखालीही तेथील वाहतूक पोलिसांनी ही मोहीम राबविली. ही मोहीम १२ सप्टेंबर रोजी वाशी आणि तुर्भे शाखेत, तर १५ सप्टेंबरला पनवेल आणि कळंबोली शाखेत राबविली जाणार आहे.