अनधिकृत बांधकामांवर कारवाई

नवी मुंबई : महापालिकेच्या अतिक्रमणविरोधी विभागाने कारवाईचा धडाका सुरूच ठेवला आहे. शुक्रवारी पालिकेने ऐरोली सेक्टर ९मध्ये हॉटेल्स आणि गॅरेजवाल्याने केलेल्या अतिरिक्त बांधकामांवर धडक कारवाई करून ती पाडली. त्यामुळे या परिसरातील व्यावसायिकांचे धाबे दणाणले आहे.

महापालिका आयुक्त तुकाराम मुंढे यांनी काही दिवसांपूर्वी ऐरोली परिसरात ‘वॉक विथ कमिशनर’ या उपक्रमाचे आयोजन केले होते. याअंतर्गत अनेक रहिवाशांनी या परिसरातील बेकायदा बांधकामांविषयी आयुक्तांकडे तक्रारी केल्या होत्या. या तक्रारींची दखल घेत ऐरोली परिसरातील गरम मसाला हॉटेल ते मुक्काम्बिका शोरुम्स या दरम्यानच्या अनधिकृत बांधकामांवर कारवाई करण्यात आली.

या परिसरात हॉटेल्स व गॅरेजचालकांनी मोठ्या प्रमाणात बेकायदा बांधकामे केली होती. अनेकांनी वेदर शेडच्या नावाखाली मार्जिनल स्पेसवर अतिक्रमण केले होते. पालिकेचे ऐरोली विभाग अधिकारी तथा सहाय्यक आयुक्त तुषार पवार यांच्या नेतृत्वाखाली अतिक्रमण विभागाचे नीलेश मोरे यांच्या पथकाने या ठिकाणी कारवाई करून परिसर मोकळा केला.