‘खेळाडू दत्तक’ची अंमलबजावणी

नवी मुंबई ः क्रीडापट्टूंना आवश्यक आर्थिक सहाय्य मिळावे, या उद्देशाने खेळाडू दत्तक घेऊन व्यावसायिक संघ तयार करण्याचे धोरण सरकारने निश्चित केले होते. त्यानुसार खेळाडू दत्तक घेण्याच्या योजनेची अंमलबजावणी होण्याकरिता नवी मुंबई महानगरपालिकेने होतकरू कबड्डी, खो-खो व शूटिंगबॉलपट्टूंना दत्तक घेऊन व्यावसायिक संघ तयार करण्यासाठी पाऊल उचलले आहे.

महापालिकेच्या संघामध्ये निवड होणाऱ्या खेळाडूंची ११ महिने करारपद्धतीने मासिक १५ हजार इतक्या मनधनावर तात्पुरत्या स्वरूपात नेमणूक करण्यात येणार आहे. त्याचबरोबर खेळाडूंना सर्व प्रकारच्या क्रीडा सुविधा व आवश्यक क्रीडा साहित्य महापालिकेच्या वतीने मोफत उपलब्ध करून देण्यात येणार आहे. देशांतर्गत होणाऱ्या सर्व अधिकृत स्पर्धांमध्ये खेळाडूंना सहभागी होता येणार आहे.