\Bम. टा. प्रतिनिधी, औरंगाबाद
\Bआमच्याकडे बघून आम्हाला सहानुभूती नका करू. आम्हाला अरेरे बिचारे नका म्हणू. इतरांपेक्षा वेगळे वाटत असलो तरी आमच्याही स्वतंत्र क्षमता आहेत. आमच्या वेगळ्या गरजा आहेत. आमचा उघडपणे स्वीकार करा आणि स्वतःसोबत सामील करा, असे हसत - हसत आवाहन करणारे विशेष मुल आणि त्यांच्या पालकांचे हसरे चेहरे फोटोप्रदर्शन सर्वांच्या कौतुकास पात्र ठरले.
विशेष क्षमता असलेल्या मुलांमध्ये किंवा विशेष गरजा असलेल्या मुलांसाठी शनिवारी 'हसरे चेहरे' फोटो प्रदर्शन आयोजित करण्यात आले होते. जागतिक अपंग दिनी ( ३ डिसेंबर) आणि जागतिक मतिमंद दिनानिमित्त ( ८ डिसेंबर ) विहंग विशेष मुलांची शाळेने प्रोझोन मॉल येथे कार्यक्रम घेतला. विहंगचे विद्यार्थी आणि पालकांच्या हस्ते प्रदर्शनाचे उद्घाटन झाले. जागतिक अपंग दिन शब्दातील अपंग हा शब्द काढून 'विविध क्षमतेचा दिवस' ओळखला जावा यासाठी यावेळी सह्या घेण्यात आल्या. अपंग दिन नव्हे तर विविध क्षमतांचा दिन म्हणून विहंगने या मुलांना दिले जाणारे शिक्षण, पुस्तके, शैक्षणिक साहित्य प्रदर्शनात ठेवले. ही मुलेही इतर मुलांप्रमाणेच शिकू शकतात आणि त्यांना शिक्षण देण्याच्या आदर्श पद्धती याविषयी माहिती देण्यात आली. या मुलांच्या क्षमता खूप वेगळ्या आहेत. आमची मुले फक्त वेगळ्या पद्धतीने बोलतात, संवाद साधतात. असे असले तरी पालकांनी त्याचा उघडपणे स्वीकार करावा. विशेष मुलांनाही शिक्षणाचा अधिकार आहे आणि तो त्यांना मिळायलाच हवा, असे आवाहन आम्ही पालकांना केले. पालकांनी आपल्या मुलांना घरापुरते मर्यादित न ठेवता सार्वजनिक ठिकाणी मुलांचा उघडपणे स्वीकार करावा म्हणून विहंगने पालकांना या मुलांचे फोटो मागवले होते. पालकांनी आवाहनाला प्रतिसाद देत मुलांसोबत स्वतःचेही फोटो पाठवले. कार्यक्रमाच्या यशस्वितेसाठी विहंगच्या संचालिका आदिती शार्दुल, शिल्पा महागावकर, करूणा राजपूत, वंदना चाबुकस्वार, माया गुट्टे, गोदावरी वरकुले आणि प्रोझोनचे मुख्य महंमद अर्शद प्रमुख आणि आकाश जोशी यांनी परिश्रम घेतले.