म. टा. प्रतिनिधी, मुंबई
ज्येष्ठ पत्रकार आणि लेखक सुरेश द्वादशीवार यांच्या 'गांधीजी आणि त्यांचे टीकाकार' या वैचारिक ग्रंथाला यंदाचा केशवराव कोठावळे पुरस्कार जाहीर झाला आहे. केशवराव कोठावळे पारितोषिक समितीने २०१९ या वर्षातील पुरस्कारासाठी द्वादशीवार यांची एकमताने निवड केल्याचे पारितोषिकाचे निमंत्रक अशोक कोठावळे यांनी सांगितले. हा पुरस्कार मंगळवार २१ मे रोजी धुरू हॉल, पहिला मजला, दादर सार्वजनिक वाचनालय, छबिलदास रोड, दादर पश्चिम येथे ज्येष्ठ प्रकाशक रामदास भटकळ यांच्या हस्ते प्रदान करण्यात येणार आहे.
जगाच्या इतिहासात अनेक विचारप्रवाह आले आणि लुप्त झाले; परंतु गांधीजींच्या विचारांचा प्रभाव अजून कायम आहे. हा प्रवाह अधिकाधिक वजनदार होताना दिसत आहे. गांधीजींचा विचार ग्रंथबद्ध नाही, पण त्यात एकसूत्रता आहे. काळानुरूप बदलणाऱ्या त्यांच्या भूमिकेमुळे ते अनेकदा अनाकलनीय वाटतात. गांधीजींवर ज्या ज्या नेत्यांनी, विचारवंतांनी भाष्य केले, त्यांच्या आक्षेपांचे लेखकाने योग्य प्रकारे खंडन केले आहे. त्यासाठी अनेक दाखले आणि तपशील दिले आहेत. पुस्तकाची भाषा वृत्तपत्रीय आणि तटस्थ आहे. त्यामुळे गांधीजींचे मोठेपण आणि वेगळेपण अधिक प्रभावी स्वरूपात समोर येते, असे या पुस्तकाचे विवेचन करताना निवडसमितीने नमूद केले आहे. प्रा. उषा तांबे, संजिवनी खेर, श्रीराम शिधये हे या निवडसमितीचे सदस्य होते.