\Bम. टा. प्रतिनिधी, सिल्लोड
\Bभाजप तालुकाध्यक्षपदी ज्ञानेश्वर मोठे यांची फेरनिवड करण्यात आली. प्रदेश उपाध्यक्ष डॉ. भागवत कराड, पक्षाचे संघटन मंत्री भावराव देशमुख, तालुका निवडणूक अधिकारी कैलास पवार, जिल्हा सरचिटणीस लक्ष्मण औटी यांच्या प्रमुख उपस्थितीत ही निवड प्रक्रिया पार पडली.
शहरातील पक्ष कार्यालयात सोमवारी पक्षाच्या प्रमुख कार्यकर्त्यांची बैठक घेण्यात झाली. यात चर्चा करून सर्वानुमते मोठे निवड करण्यात आली. यावेळी प्रदेश कार्यकारणी सदस्य सुरेश बनकर, साखर कारखान्याचे चेअरमन इद्रीस मुलतानी, भाजयुमोचे प्रदेश उपाध्यक्ष सुनील मिरकर, जिल्हा उपाध्यक्ष दिलीप दाणेकर, माजी सभापती अशोक गरुड, ज्ञानेश्वर तायडे, जिल्हा परिषद सदस्य गजानन राऊत, गणेश बनकर, राजेंद्र जैस्वाल, शहराध्यक्ष विनोद मंडलेचा, किरण पवार, मनोज मोरेल्लू, पंचायत समिती सदस्य अनिल खरात उपस्थित होते.
यावेळी मोठे यांचा सत्कार करण्यात आला. मोठे म्हणाले, 'पक्षाने टाकलेला विश्वास सार्थ ठरवू व केंद्रीय राज्यमंत्री खा. रावसाहेब दानवे यांच्या नेतृत्वाखाली आगामी काळात सर्वांना सोबत घेऊन पक्ष संघटन अधिक मजबूत करू. पक्षाचे विचार शेवटच्या माणसापर्यंत नेऊ व तालुक्यातील विरोधीपक्षाची भूमिका चोख पार पाडू,' असा विश्वास व्यक्त केला.
\Bसांडू पाटील यांची गैरहजेरी
\Bतालुकाध्यक्ष पदाची निवड होत असताना बैठकीस माजी आमदार सांडू - पाटील लोखंडे, किसान मोर्चाचे प्रदेश सरचिटणीस मकरंद कोरडे, सिद्धेश्वर कारखान्याचे माजी चेअरमन श्रीरंग साळवे, माजी तालुकाध्यक्ष संजय डमाळे, माजी शहराध्यक्ष विष्णू काटकर आदींनी दांडी मारली. त्यामुळे बैठकीस आलेल्या कार्यकर्त्यांमध्ये याची चर्चा होती.