मुंबई : 'महाराष्ट्रात निर्माण झालेल्या राजकीय पेचप्रसंगानंतर सत्ता स्थापन करण्यासाठी पाठिंबा देण्याबाबत शिवसेनेने प्रथमच सोमवारी आमच्याशी अधिकृत संपर्क साधला होता. तथापि कोणताही महत्त्वपूर्ण निर्णय घेण्यापूर्वी सर्व मुद्यांवर स्पष्टीकरण होणे आवश्यक आहे. त्या मुद्यांबाबत आमच्या आघाडीतील दोन्ही पक्षांत संपूर्ण सहमती निर्माण झाल्यानंतर पुढील रणनीती निश्चित केली जाईल,' असे काँग्रेसचे ज्येष्ठ नेते अहमद पटेल आणि राष्ट्रवादी काँग्रेसचे अध्यक्ष शरद पवार यांनी मंगळवारी रात्री मुंबईत घेतलेल्या संयुक्त पत्रकार परिषदेत स्पष्ट केले. 'नव्या सरकारचा किमान समान कार्यक्रम काय असेल, आघाडीतील दोन्ही काँग्रेसच्या जाहीरनाम्यातील किमान समान आश्वासनांची कशी पूर्तता करता येईल. याबाबत आमच्या दोन्ही काँग्रेसमध्ये सविस्तर चर्चा करून त्यावर एकवाक्यता करण्यात येईल. निवडणुकीत आम्ही आघाडीत एकत्रित लढलो असून, आघाडीच्या मुद्द्यांबाबत चर्चा होऊन सर्वसंमती झाल्यानंतर शिवसेनेशी चर्चा करण्यात येईल,' असे काँग्रेस नेते अहमद पटेल यांनी स्पष्टपणे सांगितले; तर, 'पटेल यांनी सर्व गोष्टी स्पष्ट केल्या असून, काही मुद्दे आणि त्याचा काय परिणाम होईल. जोपर्यंत काही मुद्द्यांचे स्पष्टीकरण होत नाही, तोपर्यंत पुढे जाणे शक्य नाही. पण विचारविनिमय करण्याची प्रक्रिया सुरू झाली आहे,' असे राष्ट्रवादीचे अध्यक्ष शरद पवार यांनी स्पष्ट केले. शरद पवार आणि काँग्रेस अध्यक्षा सोनिया गांधी यांच्यात मंगळवारी सकाळी फोनवरून चर्चा झाल्यानंतर काँग्रेसच्या नेत्यांनी दिल्लीत येऊन मुंबईत पवार यांच्यासोबत प्रदीर्घ बैठक घेतली. या बैठकीत राष्ट्रवादीतर्फे शरद पवार, प्रफुल्ल पटेल, छगन भुजबळ, अजित पवार, दिलीप वळसे पाटील, सुनील तटकरे, जयंतराव पाटील, तर काँग्रेसचे ज्येष्ठ नेते अहमद पटेल, मल्लिकार्जुन खरगे, के. सी. वेणुगोपाल, बाळासाहेब थोरात, अशोक चव्हाण, पृथ्वीराज चव्हाण, माणिकराव ठाकरे आदी उपस्थित होते. या नेत्यांमध्ये जवळपास अडीच तास बैठक झाली. सत्तावाटपाचे सूत्र काय असेल, मुख्यमंत्रिपद व महत्त्वाची खाती यांचे वाटप कसे राहील, कोणत्या कार्यक्रमांना नवे सरकार प्राधान्य देईल आणि भिन्न विचारसरणीच्या पक्षाशी आघाडी करायची असेल, तर काही मुद्दे स्पष्ट होणे आवश्यक असल्याची या बैठकीत चर्चा झाली. त्यानंतर पटेल यांनी आघाडीची भूमिका मांडली.
सहमतीनंतरच आघाडीचा निर्णय
'महाराष्ट्रात निर्माण झालेल्या राजकीय पेचप्रसंगानंतर सत्ता स्थापन करण्यासाठी पाठिंबा देण्याबाबत शिवसेनेने प्रथमच सोमवारी आमच्याशी अधिकृत संपर्क ...
महाराष्ट्र टाइम्स.कॉम 13 Nov 2019, 4:00 am