सावित्री नदीत बुडालेली दुसरी बसही सापडली

मटा ऑनलाइन वृत्त । महाड

तुफान पाऊस आणि पुराच्या तडाख्यामुळे महाडजवळच्या सावित्री नदीवरील पूल कोसळल्यानं वाहून गेलेली जयगड-मुंबई एसटी बसही शोधून काढण्यात नौदलाच्या पथकाला यश आलं आहे. दोनच दिवसांपूर्वी बोरीवली-राजापूर बसचा सांगाडा त्यांनी नदीतून बाहेर काढला होता.

गेल्या मंगळवारी रात्री साडेअकरा वाजता सावित्री नदीवरील ब्रिटिशकालीन पूल कोसळला होता. या भीषण दुर्घटनेत, कोकणातून मुंबईकडे येणाऱ्या दोन एसटी बस आणि तवेरा कार पुरात वाहून गेली होती. त्यापैकी एका एसटीचा सांगाडा गुरुवारी, आठ दिवसांच्या अथक प्रयत्नांतर नौदलाच्या डायव्हिंग टीमला दिसला होता. क्रेनच्या साहाय्याने तो बाहेर काढल्यानंतर, ती बोरीवली-राजापूर बस असल्याचं स्पष्ट झालं होतं. २०० मीटरच्या परिसरातच ही बस सापडल्यानं दुसरी बसही आसपासच असण्याची शक्यता बळावली होती. नौदलाचे डायव्हर्स पुढे-पुढे जात शोध घेत होते. अखेर आज ५०० मीटरवर त्यांना दुसऱ्या एसटीचाही सांगाडा दिसला आहे. तो बाहेर काढण्याच्या दृष्टीने हालचालींना वेग आला असून इथेही क्रेनची मदत घेतली जाऊ शकते. या बसच्या सांगाड्यात काही मृतदेह सापडतात का, हे पाहावं लागेल.

दरम्यान, सावित्री नदीच्या पुरात वाहून गेलेल्या तीन वाहनांमध्ये सुमारे ४० प्रवासी होते. नौदल, तटरक्षक दल आणि एनडीआरएफनं युद्धपातळीवर बचाव आणि शोधमोहीम सुरू केली, पण कुणीही जिवंत सापडलेलं नाही. २६ जणांचे मृतदेह वेगवेगळ्या ठिकाणी सापडले असून १४ जण अजूनही बेपत्ता आहेत.