सावित्री नदीत बुडालेल्या दोन्ही बस सापडल्या!

मटा ऑनलाइन वृत्त । महाड

महाडजवळ सावित्री नदीवरील पूल कोसळल्यानं वाहून गेलेल्या दोन्ही एसटी बसचे सांगाडे आज तब्बल आठ दिवसांच्या अथक शोधमोहिमेनंतर नौदलाच्या पथकाला सापडले आहेत. पुलापासून साधारण २०० मीटरच्या परिसरातच गाळात रुतलेल्या या सांगाड्यांपैकी राजापूर-बोरीवली बसचा सांगाडा जेसीबीच्या मदतीनं पाण्याबाहेर काढण्यात आला आहे.

गेल्या मंगळवारी रात्री उशिरा सावित्री नदीवरील ब्रिटिशकालीन जीर्ण पूल कोसळला होता. तुफान पावसानंतर नदीला आलेल्या पुरात, आयुर्मान संपलेला हा पूल टिकाव धरू न शकल्याने भीषण दुर्घटना घडली होती. कोकणातून मुंबईकडे येणाऱ्या दोन एसटी आणि एक तवेरा गाडी सावित्री नदीत वाहून गेली होती. त्यात सुमारे ४० प्रवासी होते. त्यांना शोधण्यासाठी तटरक्षक दल, नौदल, एनडीआरएफ आणि सर्व संबंधित यंत्रणांनी प्रयत्नांची शर्थ केली होती. परंतु दुर्दैवानं, कुणीही जिवंत सापडलेलं नाही. आतापर्यंत २६ प्रवाशांचे मृतदेह सापडले असून १४ जण बेपत्ता आहेत. त्यांचा आणि बेपत्ता एसटी बसचा शोध नौदल पथक, एनडीआरएफचे जवान आणि स्थानिक प्रशासन घेतंय. त्यात त्यांना मोठं यश मिळालं आहे.

तब्बल आठ दिवसांनंतर, नौदलाच्या डायव्हिंग टीमला आज दोन्ही बसचे सांगाडे दिसले. पुलापासून २०० मीटर अंतरावर, साधारण चार ते आठ मीटर खोल हे सांगाडे रुतले होते. या संदर्भात लगेचच एनडीआरएफला सूचना देण्यात आली. त्यानंतर क्रेन बोलावून हे सांगाडे बाहेर काढण्याचे प्रयत्न प्रशासनानं सुरू केले. त्याला यश येत असून एका बसचा सांगाडा बाहेर काढण्यात आला आहे.

दरम्यान, सावित्री नदीत रोज १२ ते १४ तास शोधमोहीम सुरू असून पाण्याचा वेगवान प्रवाह आणि मगरींची भीती असतानाही डायव्हर्स पाण्याखाली जाऊन प्रवाशांचा शोध घेत आहेत.