म. टा. प्रतिनिधी, मुंबई
महाराष्ट्रासह देशभरात रस्ता अपघातात मृत्युमुखी पडणाऱ्यांची संख्या लक्षणीय असून, मोटार अपघातांची संख्या आटोक्यात आणण्यासाठी विविध पातळीवर प्रयत्न सुरू आहेत. त्याचाच एक भाग म्हणून रस्ते सुरक्षा जनजागृतीसाठी १८ नोव्हेंबर रोजी राज्यात १५० ठिकाणी राज्यस्तरीय महावॉकेथॉन स्पर्धा आयोजित करण्यात आली आहे.
राज्य सरकारच्या परिवहन विभाग, सार्वजनिक बांधकाम विभाग, मोटार वाहन विभाग, सीएएसआय ग्लोबल आणि सीएसआर डायरी यांच्या संयुक्त विद्यमाने ही स्पर्धा आयोजिण्यात आली आहे. रस्ता सुरक्षा जनजागृतीसाठी दोन किलोमीटरच्या या स्पर्धेत राज्यातील दीड लाख शालेय व महाविद्यालयीन विद्यार्थी पालकांसह सहभागी होणार आहेत. या स्पर्धेच्या माध्यमातून जवळपास २० लाख नागरिकांपर्यंत हा उपक्रम पोहोचविण्याचे उद्दिष्ट आहे. या स्पर्धेत पहिल्यांदाच धावपटूंसह कुटुंबांतील सदस्यांनांही सहभागी होता येणार आहे.
हा वॉकेथॉन १५० ठिकाणी एकाच दिवशी, एकाच वेळेला घेतली जाणार असून या स्पर्धेची लिम्का बुक ऑफ रेकॉर्डमध्ये नोंदविण्याचे आयोजकांचे उद्दिष्ट आहे. रायगड जिल्ह्यातील पनवेल आणि विदर्भातील अमरावती येथे प्रत्येकी ५०० विद्यार्थ्यांसह पालकांना मार्गदर्शन केले जाणार आहे. १८ नोव्हेंबर २०१८ रोजी सकाळी ८ वाजता ही स्पर्धा सुरू होणार असून जागतिक विक्रम करण्याच्या आयोजकांचा मानस आहे. विद्यार्थी हे देशाचे भविष्य असून दीड लाख विद्यार्थी त्यांच्या मित्र आणि पालकांसह स्पर्धेत सहभागी होतील, अशी अपेक्षा असून यांच्यामार्फत दररोज रस्ता सुरक्षा, नो हार्न, वाहन चालकांची जबाबदारी आणि त्यांनी घ्यावयाची काळजी याबाबत समाजात जागरुकता निर्माण होईल, असा विश्वास आयोजक सीएसआय ग्लोबलचे संचालक डॉ. परेश शेठ यांनी व्यक्त केला आहे. या उपक्रमासाठी राज्यातील विद्यार्थ्यांकडून उत्स्फूर्त प्रतिसाद लाभत असल्याचा दावाही त्यांनी केला आहे.