वृत्तसंस्था, मुंबई
अनेक बँकांना सहा हजार कोटी रुपयांहून अधिक रकमेचा गंडा घालून देशाबाहेर पळून गेलेला उद्योगपती विजय मल्ल्या याच्या ए-३१९ या आलिशान खासगी जेट विमानाला अखेर खरेदीदार मिळाला आहे. तब्बल चार वेळा लिलाव फसल्यानंतर अमेरिकेतील फ्लोरिडा येथील 'एव्हिएशन मॅनेजमेंट सेल्स' या संस्थेने ३४ कोटी ८० लाख रुपयांना (५.०५ दशलक्ष अमेरिकी डॉलर्स) हे विमान विकत घेण्याची तयारी दर्शवली आहे.
मल्ल्याची किंगफिशर एअरलाइन्स कंपनी २०१२मध्ये कर्जबाजारी झाली. तोपर्यंत या कंपनीने विक्रीकर विभागाचा तब्बल आठशे कोटी रुपयांचा विक्रीकर थकवला होता. त्यामुळे या विभागाने मल्ल्याचे हे विमान डिसेंबर-२०१३मध्ये जप्त केले होते. तेव्हापासून हे विमान मुंबईतील छत्रपती शिवाजी महाराज आंतरराष्ट्रीय विमानतळावर 'हँगर'मध्ये उभे आहे. अनेक वर्षांपासून आपल्या आवारात हे विमान असेच उभे असल्याने आपले मोठे आर्थिक नुकसान होत आहे, असे म्हणत 'मुंबई इंटरनॅशनल एअरपोर्ट लिमिटेड'ने (एमआयएएल) अखेर याप्रश्नी मुंबई उच्च न्यायालयात याचिका केली. त्यानंतर विक्रीकर विभागाने 'एमएसटीसी'मार्फत विमानाच्या लिलावाची प्रक्रिया सुरू केली. मात्र त्यास अपेक्षित प्रतिसाद मिळत नसल्याने अत्यंत वर्दळीच्या मुंबई विमानतळाची जागा अनावश्यकपणे अडकून पडली असल्याचे लक्षात घेत मुंबई उच्च न्यायालयाने या विमानाचे हक्कपत्र व कागदपत्रांचा ताबा असलेल्या कर्नाटक उच्च न्यायालयाच्या अधिकाऱ्याला हे विमान अन्यत्र हलवण्यासाठी पावले उचलण्याचे निर्देश दिले होते. या पार्श्वभूमीवर, विक्रीकर विभागाने नुकताच पुन्हा ई-लिलाव केला आणि त्यात अमेरिकी संस्थेकडून बऱ्यापैकी बोली आली. त्यामुळे विभागाने ती स्वीकारून लिलाव अंतिम केला. आता मुंबई उच्च न्यायालयाच्या मंजुरीनंतर विमानाचा लिलाव केला जाईल, असे सूत्रांनी सांगितले.
पहिली बोली केवळ एक कोटींची
मार्च २०१६मध्ये पहिल्यांदा लिलाव करताना विक्रीकर विभागाने या विमानाच्या बोलीसाठी १५२ कोटी रुपयांची राखीव किंमत ठरवली होती. परंतु, अवघ्या एक कोटी नऊ लाखांची बोली लावणारा एकच इच्छुक खरेदीदार पुढे आला. त्यामुळे विभागाने तो लिलाव रद्द करून नंतर राखीव किंमत कमी करत आणखी तीनदा लिलावांची प्रक्रिया केली. मात्र, त्यांना अपेक्षित प्रतिसाद मिळाला नव्हता.