कुर्ला स्थानकातून जात असताना अत्याचार
पैसेही हिसकावले, चार नराधमांना अटक
सुरक्षा पुन्हा एकदा ऐरणीवर
म. टा. खास प्रतिनिधी, मुंबई
कुर्ला स्थानकातून कुर्ला टर्मिनस (लोकमान्य टिळक टर्मिनस) कडे जाणाऱ्या महिलेवर सोमवारी रात्री चार तरुणांनी सामूहिक बलात्कार केला. याबाबत तत्काळ गुन्हा दाखल करून नेहरूनगर पोलिसांनी चार नराधमांना अटक केली. लैगिक अत्याचार केल्यानंतर या नराधमांनी महिलेकडील पैसेही हिसकावून घेतले. दरम्यान या घटनेमुळे लोकमान्य टिळक टर्मिनस जवळील सुरक्षा पुन्हा एकदा ऐरणीवर आली आहे. नोव्हेंबर महिन्यातही टर्मिनसजवळ एका महिलेवर चौघांनी बलात्कार केला होता.
कुर्ला रेल्वे स्थानकातून सोमवारी रात्री याच परिसरात राहणारी प्रिया (बदललेले नाव) ही महिला लोकमान्य टिळक टर्मिनसच्या दिशेने एकटीच पायी जात होती. रात्री अकराच्या दरम्यान लोकमान्य टिळक टर्मिनस जवळ असलेल्या साबळे नगरात सोनू तिवारी आणि निलेश बारसकर या दोन तरुणांची नजर तिच्यावर पडली. लघुशंकेसाठी आडोशाला जात असल्याचे पाहून हे दोघेही प्रिया हिच्या मागे गेले आणि येथे असलेल्या झुडपामागे नेऊन दोघांनी तिच्यावर लैगिक अत्याचार केला. याचवेळी येथून दुचाकीवरून जाणाऱ्या सिद्धार्थ वाघ आणि श्रीकांत भोगले या दोघांनी प्रिया हिच्यावर दोघे लैंगिक अत्याचार करीत असल्याचे पाहिले. हे दोघेही झुडपामध्ये गेले आणि त्यांनीही प्रिया हिच्यावर बलात्कार केला. या चौघांचा अत्याचार इतक्यावरच थांबला नाही. त्यांनी या महिलेकडे असलेले सुमारे ३ हजार रुपयांची रोकड हिसकावली. तिच्या गळ्यातील मंगळसूत्रही हिसकाविण्याचा प्रयत्न केला. याचवेळी येथून जाणाऱ्या दुसऱ्या एका महिलेने हा प्रकार पहिला आणि पोलिसांच्या नियंत्रण कक्षाला माहिती दिली. नियंत्रण कक्षाकडून कळताच नेहरूनगर पोलिस घटनास्थळी पोहोचले. स्थनिक नागरिकांच्या मदतीने दोघांना काही वेळेतच पकडण्यात आले. तर त्यांनी दिलेल्या माहितीनुसार इतर दोघांना अटक करण्यात आली. या चौघांविरुद्ध नेहरूनगर पोलिस ठाण्यात ३७६ (बलात्कार), अनैसर्गिक संभोग (३७७), जबरी चोरी (३९४) या कलमांतर्गत गुन्हा दाखल करण्यात आला आहे. तिवारी आणि बारसकर हे दोघे टर्मिनसच्या आवारातच खाद्यपदार्थ विकतात, वाघ टॅक्सीचालक तर भोगले हा डिलिव्हरी बॉय असल्याची माहिती चौकशीतून समोर आली आहे.