म. टा. विशेष प्रतिनिधी, मुंबई
राष्ट्रीय वैद्यकीय आयोग विधेयकाविरोधात देशभरातील डॉक्टरांनी आज, बुधवारी संपाची हाक दिली असून, हे विधेयक रुग्णहितालाही मारक असल्याचा आक्षेप त्यांनी नोंदवला आहे.
लोकशाहीविरोधी असलेल्या या विधेयकामुळे ज्यांना औषधे तसेच वैद्यकीय उपचारपद्धतीविषयी कोणतेही ज्ञान नाही, त्यांना 'कम्युनिटी हेल्थ प्रोव्हायडर'च्या नावाखाली आधुनिक वैद्यक क्षेत्रामध्ये शिरकाव करण्याची संधी मिळेल. त्यामुळे रुग्णहितालाही बाधा निर्माण होईल', अशी भीती इंडियन मेडिकल असोसिएशनने व्यक्त केली. या समितीतील एकूण २५ सदस्यांपैकी एक अध्यक्ष हा नामनिर्देशित आणि १० हे पदसिद्ध असतील. उरलेल्या १४ सदस्यांची नेमणूक ज्या वैद्यकीय घटकांतून होईल, त्यामध्ये महाराष्ट्राला प्रतिनिधित्व मिळण्याविषयी वैद्यकीय तज्ज्ञांनी साशंकता वर्तवली आहे.
राष्ट्रीय वैद्यकीय आयोग विधेयक विरोधात ' आयएमए'ने कामबंद आंदोलन पुकारण्याचा निर्णय घेतला आहे. बुधवारी सकाळी सहापासून गुरुवारी सकाळपर्यंत ओपीडी बंद ठेवण्याचा निर्णय घेण्यात आला आहे. मात्र आपत्कालीन सेवा या बंद दरम्यान सुरू राहतील. या विधेयकाला आयएमएचा विरोध कायम आहे. - डॉ. सुहास पिंगळे, इंडियन मेडिकल असोसिएशनचे महाराष्ट्र सचिव