वाशीत फेरीवाल्यांवर मनसेचा हल्ला

मटा ऑनलाइन वृत्त । नवी मुंबई

मनसे विभाग अध्यक्ष सुशांत माळवदे यांच्यावर मालाडमध्ये फेरीवाल्यांनी हल्ला केल्याने मनसे कार्यकर्ते फेरीवाल्यांविरोधात अधिक आक्रमक झाले असून दादरनंतर आज वाशीतही फेरीवाल्यांना तडाखा देण्यात आला. वाशी रेल्वेस्थानकाबाहेर मनसे कार्यकर्त्यांनी अचानक धडक देत अनेक अनधिकृत स्टॉल्स उद्ध्वस्त केले.

काँग्रेसचे मुंबई अध्यक्ष संजय निरुपम यांनी शनिवारी मालाडमध्ये फेरीवाल्यांचा मेळावा घेऊन मनसे कार्यकर्त्यांना जशास तसे उत्तर देण्याचे आवाहन केले होते. त्यानंतर मनसे कार्यकर्त्यांवर फेरीवाल्यांनी हल्ला केला होता. या हल्ल्यात मनसे विभाग अध्यक्ष सुशांत माळवदे गंभीर जखमी झाले होते. या घटनेने वातावरण अधिकच चिघळले असून संतप्त मनसे कार्यकर्त्यांनी फेरीवाल्यांविरोधात आक्रमक पवित्रा घेतला आहे. या घटनेनंतर काल रात्रीच दादरमध्ये फेरीवाल्यांना लक्ष्य करण्यात आले आणि आज वाशीतही त्याची पुनरावृत्ती झाली.

वाशी रेल्वे स्थानकाबाहेर असलेले फेरीवाल्यांचे अनधिकृत स्टॉल्स आणि हातगाड्याची मनसे कार्यकर्त्यांनी तोडफोड केली. संजय निरुपम यांच्या निषेधाच्या घोषणा देत मनसे कार्यकर्त्यांनी राडा केला.